Azərbaycanda benzin BAHALAŞACAQMI? — İQTİSADÇIDAN AÇIQLAMA

Dünya bazarında enerji daşıyıcılarının qiymətində müşahidə olunan artım və region ölkələrində yanacağın bahalaşması Azərbaycanda da benzin qiymətlərinin artırılması ilə bağlı müzakirələri yenidən gündəmə gətirib. Son aylarda beynəlxalq neft bazarındakı dalğalanmalar fonunda vətəndaşları maraqlandıran əsas sual budur: Azərbaycanda benzinin qiyməti yenidən artacaqmı?

Məsələ ilə bağlı Oxu24.com-a açıqlama verən iqtisadçı Günay Hüseynova bildirib ki, region ölkələrindəki qiymət artımı Azərbaycan iqtisadiyyatında birbaşa bahalaşmaya əsas vermir:

“İlk növbədə bir məsələyə aydınlıq gətirim ki, dünya bazarında enerji daşıyıcılarının qiymətində müşahidə olunan artımın region ölkələrində enerji qiymətlərinə təsiri həmin ölkələrin xalis idxalçı olması ilə əlaqədardır. Bundan əlavə, əgər o sahədə bərpa, restavrasiya və quruculuq işlərinə ehtiyac varsa, o zaman qiymətlər yüksəlir. Yəni region ölkələrindəki bu artım, Azərbaycan iqtisadiyyatında da qiymətlərin mütləq qalxacağı anlamına gəlmir”.

“Geosiyasi gərginlik bizə təsir etməz"

Ekspert qeyd edib ki, Azərbaycanın enerji sektorundakı mövqeyi ölkəni xarici risklərdən sığortalayır. 

Vətəndaşları ən çox maraqlandıran daxili bazarda benzinin qiymət artımı məsələsinə gəldikdə isə, iqtisadçı mövcud vəziyyəti və gələcək meyilləri detallaşdırıb. İqtisadçı açıq şəkildə bildirib ki, hal-hazırda Azərbaycanda benzinin qiymətinin qalxması və hər hansı bir bahalaşma dalğası gözlənilmir:

“Enerji sektorunda ixracçı ölkə olduğumuz üçün regionda yaşanan hər hansı geosiyasi gərginlik ölkə iqtisadiyyatına birbaşa mənfi təsir göstərə bilməz.

Hazırda ölkədə benzinin qiymətinin qalxması gözlənilmir. Lakin gələcəkdə bu sahə üzrə daxili xərclər və investisiyalar artarsa, bu, benzin qiymətlərinə təsirsiz ötüşməyəcək”.

Ekspert şərhinin sonunda daxili bazarda qiymət hərəkətliliyinin daha çox hansı dövrlərdə qeydə alına biləcəyinə də toxunub. O qeyd edib ki, müəyyən iqtisadi amillərin təsiri ilə ilin sonunda, həmçinin yeni ilin ilk aylarında ümumi qiymət artımı meyllərinin daxili bazarda müşahidə edilməsi mümkündür. Lakin bu meyllər tamamilə daxili xərclərin gedişatından asılı olaraq formalaşacaq.

"Bir qayda olaraq, ilin sonu, həmçinin yeni ilin ilk aylarında müəyyən qiymət tənzimlənmələri və artım meylləri müşahidə edilə bilər. Lakin bu, tamamilə daxili istehsal xərclərindən və iqtisadi zərurətlərdən asılı olacaq”.

Çimnaz Telmanqızı

Həmçinin oxuyun

Pensiyalar 9,3 faiz indeksləşdirilərək artırılıb  —  RƏSMİ AÇIQLAMA

SON DƏQİQƏ! Milli Məclis mühüm qərarlar qəbul edib 

Azərbaycan Lideri Şuşadan hansı mesajları verib? — Mötəbər tədbirin incə MƏQAMLARI

Şuşa Media Forumunda Prezidentin yanında diqqətçəkən xanım kimdir? - FOTOLAR