Bir fincan kofe üçün 8 manat: Azərbaycanda qəhvəyə maraq niyə artır? 

Azərbaycanda son illərdə qəhvə istehlakı və qəhvə mədəniyyəti sürətlə inkişaf edir. Ənənəvi olaraq çay ölkəsi kimi tanınan Azərbaycanda artıq kofe gündəlik həyatın ayrılmaz hissəsinə çevrilməkdədir. Xüsusilə gənclər, tələbələr və ofis əməkdaşları arasında qəhvəyə maraq əhəmiyyətli dərəcədə artıb.

Oxu24.com xəbər verir ki,paytaxt Bakı ilə yanaşı, regionlarda da yeni nəsil kofeşopların sayı artır.

Müxtəlif növ qəhvə içkiləri, fərqli hazırlanma üsulları və rahat iş mühiti təqdim edən məkanlar qəhvə həvəskarlarının əsas görüş nöqtələrinə çevrilib.

Rəsmi statistik göstəricilər də bu tendensiyanı təsdiqləyir.

Məlumata görə, Azərbaycan 2025-ci ilin ilk 11 ayında 663 ton qəhvə idxal edib. İdxalın həcmi və dəyəri əvvəlki illərlə müqayisədə artım nümayiş etdirib. Ölkəyə qəhvə əsasən İtaliya, Braziliya, Türkiyə və Kolumbiyadan gətirilir.

Bazarda qiymətlər də müxtəlifdir. Kofeşoplarda bir fincan qəhvənin qiyməti növündən və təqdimatından asılı olaraq 4-8 manat arasında dəyişir. Məsələn, Bakıda fəaliyyət göstərən müxtəlif   kofeşoplarda espresso və doppio 5 manata, V60 qəhvəsi 7 manata, flat white 6 manata təklif olunur. Cappuccino və latte ölçüsündən asılı olaraq 5,5-7 manat arasında dəyişir. Daha premium içkilərdən olan raff və matcha isə 8 manata satılır.

Soyuq qəhvə içkilərinə də maraq artır. Iced Latte, Espresso Tonik, Iced Mocha və Bumble Coffee kimi məhsulların qiyməti 6-8 manat arasında dəyişir.

Mütəxəssislər hesab edirlər ki, çay hələ də Azərbaycan bazarında lider mövqeyini qoruyur. Lakin dəyişən həyat tərzi, yeni biznes konsepsiyaları və qəhvə mədəniyyətinin geniş yayılması yaxın illərdə bu bazarın daha da böyüməsinə şərait yaradacaq.

Sosial şəbəkələrdə aparılan müzakirələr də göstərir ki, xüsusilə 20-40 yaş arası insanlar arasında qəhvə istehlakı son illərdə əhəmiyyətli dərəcədə artıb. Bir çox istifadəçilər universitetlərdə, biznes mərkəzlərində və ictimai məkanlarda qəhvənin artıq gündəlik həyatın vacib hissəsinə çevrildiyini bildirirlər.

Beləliklə, Azərbaycanda çay ənənələri qorunub saxlanılsa da, qəhvə bazarı və qəhvə mədəniyyəti hər il daha çox inkişaf edərək yeni istehlakçı auditoriyası qazanır.

Hazırladı:Vüsal Qarabağlı

Həmçinin oxuyun

Əvəz Zeynallı VƏFAT ETDİ 

Milli Hidrometeorologiya Xidməti bu tarixdə Azərbaycana qar yağacağını AÇIQLADI

Müharibə belə başlayıbmış   —  Canlı şahid tükürpədici HADİSƏNİ  DANIŞDI

Avromobilinə bunu yapışdıran sürücü cərimə oluna bilərmi? —  EKSPERT AÇIQLADI