Reytinqli verilişlər niyə bağlanır?— Media eksperti DANIŞDI

CƏMİYYƏT

1428

19.03.2026, 12:28

Son günlər Azərbaycan televiziya məkanında baş verən dəyişikliklər ictimaiyyətin diqqət mərkəzinə çevrilib. Uzun illər tamaşaçıların maraqla izlədiyi bir sıra əyləncə və tok-şou proqramlarının efirdən getməsi geniş müzakirələrə səbəb olub. Xüsusilə yüksək reytinq toplayan verilişlərin belə bağlanması tamaşaçı auditoriyasının gələcəkdə hansı məzmunlara yönələcəyi ilə bağlı suallar doğurur.

Mövcud vəziyyət fonunda əsas sual isə açıq qalır: televiziya kanalları yaranan boşluğu doldura biləcəkmi, yoxsa tamaşaçılar alternativ platformalara üz tutacaq? Məsələ ilə bağlı media eksperti ilə həmsöhbət olduq.

Məsələ ilə bağlı Mətbuat Şurası İH üzvü, media eksperti Müşfiq Ələsgərli Oxu24.com-a açıqlamasında bildirib ki, medianın əsas vəzifələrindən biri əyləndirmək olsa da, bu proses maarifləndirmədən kənarda qalmamalıdır:

“Təəssüf ki, yerli televiziya məkanında şou proqramların bir qismi peşəkarlıqdan uzaq, ictimai maraqlara və mənəvi dəyərlərə zidd formatda təqdim olunur. Xüsusilə ailə-məişət mövzularının primitiv şəkildə müzakirəyə çıxarılması cəmiyyətdə haqlı narazılıq doğurur.

Düşünürəm ki, şou proqramların efirdən yığışdırılması deyil, onların məzmununun keyfiyyətlə əvəzlənməsi əsas hədəf olmalıdır. Azərbaycanda bununla bağlı kifayət qədər uğurlu təcrübə var. Vaxtilə siyasi, mədəni və sosial məsələlər efirdə "abırlı" və faydalı şəkildə müzakirə olunurdu. Bu ənənələri müasir texnologiyalarla birləşdirib, daha keyfiyyətli məhsul ortaya qoymaq mümkündür.

"Auditoriya bayağılığa baxır" fikri yanlışdır. Ciddi mövzular ətrafında qurulan, peşəkar hazırlanan verilişlərin də böyük izləyici kütləsi topladığına dair nümunələrimiz çoxdur. Artıq efir mədəniyyətini bərpa etmək üçün ciddi addımların vaxtı çatıb”,-deyə ekspert qeyd edib.

Çimnaz Telmanqızı

Həmçinin oxuyun