Maşınlar üçün "yaş limiti" gəlir — Sürücülərin nəzərinə!

Azərbaycanda istismar müddətini başa vurmuş nəqliyyat vasitələrinə yaş limitinin tətbiqi məsələsi yenidən gündəmin əsas mövzusuna çevrilib. Bu addım həm ekoloji mühitin saflaşdırılması, həm də yollardakı qanlı qəzaların qarşısının alınması məqsədilə müzakirə olunsa da, xüsusilə köhnə maşın sahibləri arasında müəyyən narahatlıqlar yaradıb. Çoxları bu qərarın büdcələrinə ciddi zərbə vuracağını düşünür.

 Oxu24.com xəbər verir ki,nəqliyyat eksperti Yasin Mustafayev məsələ ilə bağlı Demokrat.az-a danışarkən bildirib ki, hazırda köhnə avtomobillərə yaş limiti tətbiq ediləcəyi barədə hələ dəqiq bir qərar yoxdur. Bununla belə, ekspert hesab edir ki, vaxtı keçmiş texnikaların yollardan çəkilməsi qaçılmazdır.

“Lakin çox köhnə avtomobillərin yığışdırılması ölkə üçün müsbət və faydalı bir addım olardı. Bu, həm yol təhlükəsizliyinin təmin olunması, həm də sürücülərin və digər yol istifadəçilərinin həyatının qorunması baxımından vacibdir”, – deyə o vurğulayıb.

Reallıq isə ondan ibarətdir ki, paytaxtdan fərqli olaraq, bölgələrdə mənzərə tam başqadır. Rayon və kənd yerlərində sovet dövründən qalma maşınlar hələ də əsas nəqliyyat vasitəsi hesab olunur. Ekspert də bu məqama toxunaraq qeyd edib ki, insanlar həmin avtomobillərdən gündəlik həyatlarında, şəxsi işlərində və təsərrüfat fəaliyyətlərində geniş istifadə edirlər.

Onun sözlərinə görə, həmin texnikalar uzaq və çətin relyefli ərazilərdə hələ də insanların köməyinə çatır. Ancaq bu, onların təhlükəli olduğu həqiqətini dəyişmir. Yasin Mustafayev əlavə edib ki, “onların texniki vəziyyəti kifayət qədər zəifdir və müasir yol-nəqliyyat təhlükəsizlik standartlarına cavab vermir”.

Həmçinin oxuyun

“Frayburq” - “Braqa” və    "Aston Villa" – "Nottingem Forest" oyunlarını  hansı kanallar YAYIMLAYACAQ?

Prezident maaşların verilməsi ilə bağlı DƏYİŞİKLİYİ TƏSDİQLƏDİ

Prezident İlham Əliyev bu quruma yeni səlahiyyət verdi

İlham Əliyevdən məşhurlarla bağlı SƏRƏNCAM

Əsas problem isə texniki detalların köhnəlməsidir. Mühərrikdən tutmuş əyləc sisteminə qədər hər bir hissənin müəyyən bir ömrü var. İstismar müddəti dolmuş maşınlarda bu sistemlərin hər an sıradan çıxma ehtimalı yüksəkdir.

“Bu, həm sürücülər, həm də yol hərəkətində iştirak edən digər şəxslər üçün potensial təhlükə yaradır. Belə avtomobillərin davamlı istifadəsi qəza riskini artırır və yol-nəqliyyat hadisələrinin baş vermə ehtimalını yüksəldir”, – deyə ekspert xəbərdarlıq edib.

Görünən odur ki, köhnə avtomobillərin yığışdırılması sadəcə bir qadağa deyil, həm də insanların təhlükəsizliyini sığortalamaq cəhdidir. Müasir standartlara uyğun nəqliyyat vasitələrinə keçid həm ekologiya, həm də insan həyatı üçün vacibdir. Hazırda müzakirə mərhələsində olan bu qərarın yaxın gələcəkdə hansı formada icra ediləcəyi isə hələlik sual altındadır.