"Minimum əmək haqqı məbləğinə ildə bir dəfə baxılsa..." - İqtisadçı qanun dəyişikliyinin əhəmiyyətini açıb

$\"Minimum əmək haqqı məbləğinə ildə bir dəfə baxılsa...\"  -   İqtisadçı qanun dəyişikliyinin əhəmiyyətini açıb    $

CƏMİYYƏT

2892

10.02.2026, 14:57

"Əmək Məcəlləsinə" təklif edilən və artıq Milli Məclisdə birinci oxunuşda qəbul olunan dəyişikliklərə əsasən, minimum əmək haqqı məbləğinə ildə ən azı bir dəfə baxılacaq. Yeni dəyişiklik təsdiq olunduqdan sonra minimum əmək haqqı artımında dövrülük təmin olunacaq. Bu artımların artıq qanunla tənzimlənməsi anlamına da gələcək.

Bəs, bu tənzimləmə ölkədəki qiymət artımına qalib gələ bilərmi?

Liberal İqtisadçılar Mərkəzinin sədri, iqtisadçı Akif Nəsirli mövzu ilə bağlı Oxu24.com-un suallarına cavab verib. O, açıqlamasında deyib ki, minimum əmək haqqına ildə ən azı bir dəfə baxılması və artımların qanunla tənzimlənməsi əhalinin real gəlirlərini qorumaq baxımından müsbət addımdır.

"Bu, qiymət artımlarının təsirini müəyyən qədər yumuşalda bilər, çünki maaşlar inflyasiya ilə uyğunlaşacaq və aşağı gəlirli təbəqələrdə həyat səviyyəsinin qorunmasına kömək edəcək.Lakin bazar iqtisadiyyatı kontekstində bu tənzimləmə təkbaşına qiymət artımını dayandıra bilməz. Qiymətlərin ədalətli və sabit səviyyədə formalaşması üçün azad və rəqabətli bazar mühiti, monopoliyaların qarşısının alınması və rəqabət mexanizmlərinin işləməsi daha təsirli alətlərdir. Minimum əmək haqqının artırılması əsasən sosial müdafiə funksiyasını yerinə yetirir, bazar qiymətlərini birbaşa idarə etmir, amma əhalinin alıcılıq qabiliyyətini qoruyaraq inflyasiyanın mənfi təsirlərini yumuşalda bilər",- deyə iqtisadçı bildirib.

Həmçinin oxuyun