Zəfərin beşinci qışı: Laçın yenidən Azərbaycan nəfəsi alır

CƏMİYYƏT

597

01.12.2025, 11:48

Xəbərlərimizi Google-da izləyin

Yeniliklərdən dərhal xəbərdar olun

Bu gün – 1 dekabrda, Azərbaycan tarixinin ən parlaq səhifələrindən biri – Laçının azad olunmasının beşinci ildönümü qeyd olunur.

Oxu24.com xatırladır ki,2020-ci ilin həmin o unudulmaz gecəsi təkcə bir rayonun işğaldan azad edilməsi deyildi; bu, xalqın ruhunun, torpağın nəfəsinin, dağların səsinin geri qayıtması idi.

Laçın rayonu 2020-ci il noyabrın 10-da imzalanmış üçtərəfli bəyanata əsasən Azərbaycanın nəzarətinə 1 dekabr 2020-ci ildə keçdi.

Döyüşsüz təhvil verilən Laçın, 28 illik işğaldan sonra ilk dəfə Azərbaycan Ordusunun nəzarətinə qaytarıldı.

Son 5 ildə Laçında genişmiqyaslı bərpa və yenidənqurma işləri aparılıb. Laçın şəhərinin baş planı təsdiqlənib, birinci mərhələ üzrə yaşayış məhəllələri inşa olunub. Laçın rayonuna ilk köç 2022-ci ilin avqustundan başlayıb. Bu günə qədər rayona minlərlə sakin geri qayıdıb.

Laçın beş il əvvəl geri dönəndə, Qarabağ göylərinə ilk dəfə o illərdən sonra Azərbaycan əsgərinin addım səsi, üçrəngli bayrağın küləkdəki səsi, evinə qayıdan yurdun həsrət qoxusu qarışdı.

Beş il ərzində Laçında yeni yollar salındı, kəndlər bərpa olundu, işıq sobaları yenidən yandı, şəhərin qaranlıq illərdən sonrakı ilk qışında insan nəfəsi, ümid səsi, həyətində yenidən açan çiçəyin qoxusu duyuldu.

Bu gün Laçın yalnız bir coğrafiya deyil, dirçəlişin, qayıdışın, zəfərin canlı simvoludur.

Prezident İlham Əliyevin siyasi iradəsi, Azərbaycan Ordusunun gücü və xalqın birlik ruhu Laçına yeni həyat verdi.

Beş il sonra isə artıq o torpaqlarda təhlükəsiz, inkişaf edən, yenidən qurulan bir həyatın ritmi duyulur.

Laçının dağları bu gün təkcə azadlığın deyil, həm də geri dönən ata ocaqlarının, yenidən uşaqların səsi gələn küçələrin şahididir.

Beş il öncə qaranlıqdan işığa çıxan Laçın bu gün artıq yeni tarix yazır.

Zəfərin sorağı dağlardan hələ də çəkilməyib — Azərbaycan nəfəsi o torpaqlarda hər gün bir az da güclü eşidilir.

Çimnaz Telmanqızı

Həmçinin oxuyun