Gözaltı şişkinlik səbəbi hər zaman böyrək deyil – Mütəxəssis xəbərdarlıq edir

TİBB

440

25.05.2026, 22:49

Son dövrlərdə bir çox insan gözaltı qaralmalar, şişkinliklər və göz qapaqlarında yaranan ödemlə bağlı həkimlərə müraciət edir. Əksər hallarda isə insanlar bu problemləri birbaşa böyrəklərlə əlaqələndirirlər. Halbuki mütəxəssislər bildirirlər ki, gözaltı şişkinlik və qaralıqların səbəbi hər zaman böyrək xəstəliyi olmur.

Həkimlərin sözlərinə görə, böyrək problemlərinin ilkin əlamətləri çox vaxt üzdə özünü göstərir. Xüsusilə gözaltı şişkinlik, göz qapaqlarında ödem, səhərlər üz nahiyəsində şişkinlik böyrəklərin fəaliyyətində problem olduğunun göstəricisi ola bilər. Buna görə də belə əlamətlər müşahidə edilən zaman ilk növbədə böyrək müayinəsi aparılması vacib sayılır.

Ancaq mütəxəssislər qeyd edir ki, analiz və müayinələr zamanı böyrəklərdə heç bir problem aşkarlanmadığı halda belə, gözaltı qaralıq və şişkinlik davam edə bilər. Bu halların əsas səbəblərindən biri müasir həyat tərzidir.

Belə ki, uzun müddətli stress, əsəb gərginliyi, psixoloji yorğunluq, yuxusuzluq və gün ərzində həddindən artıq fiziki yüklənmə göz ətrafında qaralmalar və şişkinlik yarada bilir. Xüsusilə gec yatmaq, keyfiyyətsiz yuxu və davamlı emosional gərginlik orqanizmdə maye dövranını pozur və nəticədə üz nahiyəsində ödem yaranır.

Həkimlər bildirirlər ki, bəzi insanlarda gözaltı qaralmalar genetik xüsusiyyətlə də əlaqəli ola bilər. Dərinin nazik olması, damarların dəri altından daha çox görünməsi də qaralmaların səbəbi sayılır.

Bununla yanaşı, qalxanabənzər vəz problemləri, zob xəstəlikləri, hormonal pozuntular, ürək-damar sistemi xəstəlikləri, qan azlığı və allergik reaksiyalar da gözaltı şişkinlik və qaralmaya səbəb ola bilir.

Mütəxəssislərin sözlərinə görə, xüsusilə qalxanabənzər vəzin fəaliyyəti zəiflədikdə üzdə şişkinlik, halsızlıq və göz ətrafında dəyişikliklər daha qabarıq görünür. Ürək-damar problemlərində isə bədəndə maye toplanması nəticəsində səhərlər göz qapaqlarında şişkinlik yaranır.

Həkimlər xəbərdarlıq edir ki, bəzi insanlar kosmetik vasitələrlə problemi gizlətməyə çalışır, lakin əsas səbəb araşdırılmadıqda vəziyyət daha da ağırlaşa bilər.

Bu səbəbdən həkimlər bildirirlər ki, gözaltı qaralma və şişkinlik uzun müddət davam edirsə, bunu sadəcə yorğunluq və ya kosmetik problem kimi qiymətləndirmək olmaz. Belə hallarda orqanizmdə gizli gedən hər hansı xəstəliyin olub-olmadığını müəyyən etmək üçün böyrək funksiyalarının yoxlanılması, sidik və qan analizlərinin verilməsi, qalxanabənzər vəzin vəziyyətinin qiymətləndirilməsi, eləcə də ürək-damar sisteminin müayinəsi vacib hesab olunur. Mütəxəssislər qeyd edirlər ki, erkən diaqnostika bir çox ciddi xəstəliklərin vaxtında aşkarlanmasına və gələcək ağırlaşmaların qarşısının alınmasına kömək edir.

Mütəxəssislər sağlam həyat tərzinin bu problemlərin qarşısını almaqda mühüm rol oynadığını bildirirlər. Gün ərzində kifayət qədər su qəbul etmək, normal yuxu rejimi yaratmaq, stressi azaltmaq, duzlu qidalardan uzaq durmaq və fiziki yorğunluğu normada saxlamaq gözaltı şişkinliklərin azalmasına kömək edir.

Həkimlər vurğulayırlar ki, üzdə yaranan hər bir dəyişiklik orqanizmin daxildən verdiyi siqnaldır və xüsusilə gözaltı şişkinliklər davamlı xarakter alırsa, bunu sadəcə kosmetik problem kimi qiymətləndirmək düzgün deyil.

Nigar

Həmçinin oxuyun