Öd kisəsi polipləri və daşları nə qədər təhlükəlidir? – AÇIQLAMA

TİBB

491

21.05.2026, 14:47

Öd kisəsi xəstəlikləri müasir dövrdə ən çox rast gəlinən həzm sistemi patologiyaları arasında yer alır. Xüsusilə öd daşları və öd kisəsi polipləri həm klinik praktikada, həm də profilaktik müayinələr zamanı tez-tez aşkarlanan hallardandır.

Bu barədə Tibb üzrə fəlsəfə doktoru, ümumi cərrah Aynur Hüseynzadə Oxu24.com-a açıqlamasında bildirib ki, öd kisəsində yaranan poliplər əksər hallarda xoşxassəli törəmələr hesab olunsa da, onların izlənməsi mütləq vacibdir.

Mütəxəssisin sözlərinə görə, öd kisəsi bioloji baxımdan aktiv və aqressiv mühitə malik orqandır. Bu səbəbdən burada yaranan poliplərin zamanla dəyişmə ehtimalı mövcuddur və bəzi hallarda onların bədxassəli prosesə transformasiya riski istisna edilmir.

Həkim qeyd edir ki, poliplərin ölçüsü, sayı və dinamikası xəstənin müalicə taktikasının seçilməsində əsas rol oynayır. Əgər öd kisəsində bir neçə polip mövcuddursa və ya tək polipin ölçüsündə artım müşahidə olunursa, bu hallarda daha ciddi yanaşma tələb olunur.

Aynur Hüseynzadənin sözlərinə görə, xüsusilə böyüyən və ya şübhəli xarakter daşıyan poliplər mütəmadi nəzarətdə saxlanılmalıdır. Çünki bu dəyişikliklər gələcəkdə ağırlaşmaların göstəricisi ola bilər.

Mütəxəssis vurğulayır ki, belə hallarda ən effektiv müalicə üsullarından biri öd kisəsinin cərrahi yolla çıxarılmasıdır. Müasir tibbdə bu əməliyyat daha çox laparoskopik, yəni qapalı üsulla həyata keçirilir və xəstələr üçün daha az riskli və daha sürətli sağalma imkanı yaradır.

Həkimin sözlərinə görə, laparoskopik üsul minimal travma ilə icra olunduğu üçün əməliyyatdan sonra xəstənin gündəlik həyata qayıtma müddəti də xeyli qısalır.

Eyni zamanda, öd kisəsi polipləri ilə yanaşı öd daşları da geniş yayılmış patologiyalardandır. Bu daşlar həzm prosesində pozğunluq yarada, sağ qabırğaaltı nahiyədə ağrı, ürəkbulanma və diskomfort hissi ilə özünü göstərə bilər.

Mütəxəssis bildirir ki, bəzi hallarda öd daşları və poliplər eyni pasiyentdə birlikdə müşahidə oluna bilər ki, bu da klinik vəziyyəti daha mürəkkəb edir.

Aynur Hüseynzadə əlavə edir ki, erkən diaqnostika bu xəstəliklərin ağırlaşmasının qarşısının alınmasında əsas faktordur. Vaxtında aparılan ultrasəs müayinəsi və həkim nəzarəti sayəsində həm poliplərin dinamikası izlənilə, həm də lazım olduqda vaxtında cərrahi müdaxilə həyata keçirilə bilər.

Həkimlərin tövsiyəsinə görə, qarın nahiyəsində təkrarlayan ağrılar, həzm pozğunluğu və ya təsadüfi aşkar olunan öd kisəsi dəyişiklikləri ciddi qəbul edilməli və mütləq ixtisaslı cərrah tərəfindən qiymətləndirilməlidir.

Nigar

Həmçinin oxuyun