Komitə sədri məsələyə qarışdı:Nazirlər Kabinetinin 325 nömrəli qərarı...

“Dövlət ümumi təhsil məktəblərində müəllimlərin işgüzar geyimi və şagirdlərin vahid məktəbli formasının tətbiq olunması qanunvericiliyimizin, hüququn və Konstitusiyanın tələblərinə uyğundur”.

Oxu24.com  xəbər verir ki, bunu “Azərbaycan müəllimi”nə Milli Məclisin deputatı Musa Quliyev deyib.

Onun sözlərinə görə, Azərbaycanda ümumtəhsil məktəblərində təhsil dünyəvi xarakter daşıyır və təhsilin həm mahiyyəti, həm də forması dünyəvilik prinsipinə uyğunlaşmalıdır.

Nazirlər Kabinetinin 325 nömrəli qərarını çox vacib və doğru qərar sayan M.Quliyev qeyd edib ki, burada əsas məsələ dünyəvilik prinsipinin qəbul olunmasıdır:

“Bu prinsip nəyi ehtiva edir? Birinci növbədə, ayrı-seçkiliyin olmaması, vahid yanaşmanın tətbiqi, təhsilverənlərin və təhsilalanların rahatlığının təmin edilməsidir. Bəzi hallarda görürük ki, sosial şəbəkələrdə, müəyyən kütləvi informasiya vasitələrində bu məsələni lüzumsuz müzakirə obyektinə çevirirlər. Guya bu, islam dininə, dini atributlara qarşıdır. Bunlarla bağlı heç bir müzakirənin yeri yoxdur. Məktəblinin məktəb geyimi, mədrəsənin, mollaxananın da mollaxana geyimi var. Yəni biz mollaxana, mədrəsə ilə məktəbi səhv salmamalıyıq”.

Dini atributların məktəbə gətirilməsi doğru deyil

Deputat vurğulayıb ki, Azərbaycan dünyəvi, hüquqi, demokratik dövlətdir:

“Azərbaycanda hər kəsin dini inanclarına hörmətlə yanaşılır. Eyni zamanda, dinin dövlətdən ayrı olması da bizim Konstitusiyamızda təsbit edilib. Bu mənada dini atributların məktəbə gətirilməsi doğru deyil. Bu, məktəbin, təhsilverənlərin və təhsilalanların dünyəvilik prinsipinin pozulmasına gətirib çıxarar. Buna görə də vahid geyimin tətbiq olunması birinci növbədə təhsilin keyfiyyətinə müsbət təsir göstərəcək, normalar da bizim milli-mənəvi dəyərlərə uyğun müəyyənləşəcək. Bu həm də təhsilin keyfiyyətinə öz təsirini göstərəcək. Burada başqa bir nüans axtarmaq, "bu, dinə qarşıdır, dini nüanslara qarşıdır", – demək düzgün deyil. Belə bir şey yoxdur və ola da bilməz. Belə müzakirələri mən yersiz və mənasız hesab edirəm. Azərbaycan hüquqi dövlətdir və qanunun aliliyi hər yerdə tətbiq olunur, burada da tətbiq edilməlidir”.

Həmçinin oxuyun

Azərbaycanda koronavirus  təhlükəsi varmı? - HƏKİM DANIŞIR

Trampın Əliyevi  ABŞ-yə dəvəti Azərbaycana nə verəcək?  —  SİYASİ ŞƏRH

Azərbaycan milyonlarla gəlir qazanacaq - AÇIQLAMA

 Elm və Təhsil Nazirliyi yeni təyinatla bağlı MƏLUMAT YAYDI