Regionda nəqliyyat xəritələri yenidən cızılır: Naxçıvanla əlaqə üçün "B planı" işə düşür?

$Regionda nəqliyyat xəritələri yenidən cızılır: Naxçıvanla əlaqə üçün \"B planı\" işə düşür?  $

SİYASƏT

773

10.04.2026, 15:50

Ermənistanın siyasi eksperti Samvel Meliksetyan regionda rezonans doğuracaq proqnozla çıxış edib. Ekspertin iddiasına görə, ABŞ-nin regiondakı layihələrindən biri kimi qələmə verilən və "Tramp Marşrutu" (Zəngəzur dəhlizinin bir versiyası) adlandırılan layihənin praktiki mərhələsi ən yaxşı halda 2030-2031-ci illərdə hazır ola bilər.

"2031-ə qədər gözləmək olmaz: Digər yollar açılmalıdır".

Meliksetyan bildirib ki, layihənin tam hazır olmasına hələ uzun illər var və bu müddət ərzində regionun kommunikasiya blokadasında qalması qeyri-mümkündür. O, xüsusilə vurğulayıb:

"Tramp Marşrutunun reallaşmasını gözləyib digər kommunikasiyaları bağlı saxlamaq düzgün olmazdı. İrandakı son hadisələr göstərdi ki, Azərbaycanın Naxçıvanla daha sabit və təhlükəsiz əlaqəyə ehtiyacı var”.

Məsələni Oxu24.com-a şərh edən politoloq Əli Mustafa bildirib ki, bu cür açıqlamalar Ermənistanın Zəngəzur dəhlizindən yayınmaq cəhdi ola bilər.

Politoloqun sözlərinə görə, "digər kommunikasiyalar" dedikdə Ermənistanın öz ərazisindən keçən, lakin Azərbaycan üçün strateji və təhlükəsizlik baxımından əlverişsiz olan alternativ yollar nəzərdə tutula bilər.

Əli Mustafanın təhlilindən önəmli məqamlar:

* Strateji hədəf: Azərbaycan üçün ən uyğun və qısa yol Zəngəzur dəhlizidir.

* Ermənistanın təklifi: Ermənilər Naxçıvana gediş-gəliş üçün öz ərazilərindən keçən fərqli (dolama) marşrutlar təklif edirlər, lakin bu, rəsmi Bakı üçün təhlükəsizlik səbəbindən məqbul deyil.

* ABŞ-nin rolu: Amerikalıların Ermənistanda dəmir yollarının bərpası və tikintisi ilə bağlı artıq iş apardığı, bəzi ABŞ şirkətlərinin bu prosesə cəlb olunduğu bildirilir.

İran marşrutu təhlükədədir?

Erməni ekspertin İrandakı hadisələrə istinad etməsi təsadüfi deyil. Hazırda Azərbaycan Naxçıvanla əlaqəni əsasən İran üzərindən və hava yolu ilə təmin edir. Meliksetyanın fikrincə, regionda yaranan qeyri-sabitlik Bakını Ermənistan üzərindən keçən "müvəqqəti" yollardan istifadəyə məcbur edə bilər.

Lakin Azərbaycan tərəfi dəfələrlə bəyan edib ki, kommunikasiyaların açılması Zəngəzur dəhlizi prinsipi ilə, maneəsiz və təhlükəsiz şəkildə həyata keçirilməlidir. 2031-ci il proqnozu isə prosesin süni şəkildə uzadılması cəhdi kimi qiymətləndirilir.

Çimnaz Telmanqızı

Həmçinin oxuyun