Paraşütlə atılan 76 qunduz bölgənin taleyini dəyişdirdi

ABŞ-ın Aydaho ştatında hakimiyyət orqanları 76 qunduzu xüsusi qutulara yerləşdirərək təyyarədən paraşütlə meşəlik ərazilərə buraxıb. Qeyri-adi əməliyyatın məqsədi insanlarla məskunlaşmış ərazilərdə problem yaradan qunduzları öldürmək deyil, onları təbiətin ehtiyac duyduğu ərazilərə köçürmək olub.

Qunduzlar Çemberlen hövzəsindən tutulub. Dağlıq və sıx meşələrlə örtülü əraziyə avtomobillə getmək mümkün olmadığından, heyvanların at və qatırlarla daşınmasının da onlar üçün yorucu olacağı nəzərə alınıb. Buna görə Aydaho Balıq və Ov Departamenti daha fərqli üsula əl atıb. Departament əməkdaşı Elmo Heter qunduzların təhlükəsiz şəkildə yerə enməsi üçün xüsusi açıla bilən taxta qutular hazırlayıb. Qutulara İkinci Dünya müharibəsindən qalan paraşütlər bərkidilib.

Sistem əvvəlcə müxtəlif çəkilərdə yüklərlə sınaqdan keçirilib. Daha sonra isə Geronimo adlı qunduz üzərində test aparılıb. Sınaqlar uğurlu olduqdan sonra 1948-ci ilin avqustunda real köçürmə əməliyyatına başlanılıb.

Ümumilikdə 76 qunduz paraşütlə yeni ərazilərə endirilib və onlardan 75-i sağ qalıb.

Yeni yaşayış yerlərinə buraxıldıqdan sonra qunduzlar qısa müddətdə koloniyalar yaradıb və çaylarda bəndlər tikməyə başlayıblar.

Bu bəndlər suyun axınını yavaşladaraq yeni gölməçə və bataqlıqların yaranmasına şərait yaradıb. Zamanla həmin ərazilər balıqlar, quşlar və digər vəhşi heyvanlar üçün əlverişli yaşayış mühitinə çevrilib.

Qunduz bəndləri həmçinin suyun torpaqda daha uzun müddət qalmasına kömək edir. Suyun ətraf ərazilərə yayılması bitki örtüyünün quraqlıq dövrlərində daha uzun müddət yaşamasına imkan yaradır.

75 qunduzun təsiri illər sonra da davam edir

Qunduzların yaratdığı bataqlıqlar torpaqda suyun saxlanmasına və yeraltı suların bərpasına kömək edir. Daha rütubətli bitki örtüyü isə meşə yanğınlarının sürətlə yayılmasının qarşısını alan təbii bufer rolunu oynaya bilər.

1948-ci ildə həyata keçirilən bu qeyri-adi köçürmə əməliyyatının ekoloji təsirləri illər sonra da davam edir. Qunduzların ekosistem üçün faydaları nəzərə alınaraq, oxşar yanaşmalardan bu gün ABŞ-ın müxtəlif bölgələrində bataqlıqların və su ekosistemlərinin bərpası layihələrində istifadə olunur.

Həmçinin oxuyun

Yeni detallar:Əməliyyatı DTX keçirir: Dünya çempionu qaçdı

 Ceyhunla bağlı ŞOK DETAL

Həmin davaya görə tanınmış idmançı HƏBS EDİLDİ - FOTO

Davada həyatını itirən Ceyhunun oğlu KİMDİR? -FOTO