“Yeddi oğul istərəm” – “Cəlalın ölüm səhnəsi”nin təhlükəli kadrları – Filmdən maraqlı xatirə

MARAQLI

28.05.2026, 21:53

Azərbaycan kino tarixində xüsusi yer tutan “Yeddi oğul istərəm” filmi 1970-ci ildə “Azərbaycanfilm” kinostudiyasında istehsal olunub. Ekran əsəri rejissor Tofiq Tağızadənin quruluşunda, ssenarisi isə yazıçı Yusif Səmədoğlunun qələmindən çıxıb. Film Səməd Vurğunun məşhur “Komsomol poeması” əsasında ekranlaşdırılıb və dövrün ictimai-siyasi hadisələrini bədii dillə əks etdirən ən güclü kino nümunələrindən biri hesab olunur.

Oxu24.com xəbər verir ki,filmin əsas süjet xətti 1920-ci illərdə Azərbaycanda baş verən dəyişikliklər, sovet hakimiyyətinin qurulması prosesi və bu proses fonunda gənclərin yaşadığı ideoloji və mənəvi sınaqlar üzərində qurulub. Ekran əsərində yeddi gəncin taleyi vasitəsilə dostluq, fədakarlıq, inam və qarşıdurmalar ön plana çıxarılır.

Filmin ən yaddaqalan obrazlarından biri Cəlal obrazıdır. Bu obrazı Xalq artisti Ənvər Həsənov canlandırıb. Cəlalın taleyi və onun faciəvi ölümü filmə xüsusi dramatizm qatır və tamaşaçı yaddaşında dərin iz buraxır.

Məhz Qobustan ərazisində çəkilən Cəlalın ölüm səhnəsi Azərbaycan kino tarixində ən çox danışılan çəkiliş epizodlarından biri kimi yadda qalıb. Kino ilə bağlı yayılan xatirələrə görə, həmin səhnə çəkilərkən ciddi təhlükəli vəziyyət yaranıb. Səhnənin tələbinə uyğun olaraq aktyor Ənvər Həsənovun əlləri və ayaqları bağlanmış vəziyyətdə atın üzərinə oturdulması planlaşdırılıb. Atın isə sakit və idarəolunan şəkildə hərəkət etməsi nəzərdə tutulub.

Lakin çəkiliş zamanı gözlənilməz hadisə baş verib. Ətrafda hərəkət edən bir kərtənkələ atı qorxudub və heyvan qəfil panikaya düşərək idarədən çıxıb. At uçurum istiqamətində qaçmağa başlayıb və bu an aktyor üçün real ölüm təhlükəsi yaranıb. Vəziyyətin kritik olduğu həmin saniyələrdə çəkiliş qrupundan bir işıqçı operativ reaksiya göstərərək aktyorun həyatını xilas edib. Onun cəld müdaxiləsi sayəsində böyük faciənin qarşısı alınıb.

Bu hadisədən sonra rejissor Tofiq Tağızadə riskləri nəzərə alaraq həmin səhnənin yenidən çəkilməsinə icazə verməyib. Buna görə də filmdə Cəlalın at üzərində ölü vəziyyətdə görünən kadrı məhz həmin yeganə çəkilişdən istifadə olunaraq montaj edilib. Bu da səhnəyə daha təbii və real dramatik təsir qatıb.

Filmdəki digər simvolik səhnələrdən biri də Cəlalın ölümündən sonra komsomolçuların çıraq başında şeir söylədiyi epizoddur. Bu səhnə həm ideoloji, həm də emosional baxımdan filmin ən güclü anlarından biri kimi dəyərləndirilir və Azərbaycan kinosunun poetik üslubunu əks etdirən nümunələrdən sayılır.

“Yeddi oğul istərəm” filmi yalnız bir dövrün hadisələrini əks etdirən ekran işi deyil, həm də aktyor ifaları, musiqisi, rejissor həlli və dramatik səhnələri ilə Azərbaycan kinosunun qızıl fonduna daxil olmuş əsərdir. Bu film illər keçsə də tamaşaçılar tərəfindən maraqla izlənilir və milli kino yaddaşında xüsusi yerini qoruyur.

Hazırladı: Jalə

Həmçinin oxuyun