Torpağına "kupça" ala bilməyənlərə VACİB XƏBƏR: Çıxış yolu AÇIQLANDI

Neft ərazilərində yerləşən torpaq sahələrinə çıxarış almaq mümkündür? 

Azərbaycanda xüsusilə neft və sənaye zonalarına yaxın ərazilərdə yaşayan minlərlə vətəndaşın qarşılaşdığı əsas problemlərdən biri torpaq sahələrinə çıxarış ala bilməməkdir. Uzun illərdir istifadə olunan bəzi torpaq sahələri və fərdi yaşayış evləri olsa da, bir çox hallarda həmin əmlaklar rəsmiləşdirilmədiyi üçün vətəndaşlar hüquqi çətinliklərlə üzləşirlər.

Mövzu ilə bağlı Oxu24.com saytına açıqlama verən hüquqşünas  Adil Piriyev bildirib ki, müəyyən şərtlər daxilində neft ərazilərində yerləşən torpaq sahələrinə "kupça", yəni çıxarış  almaq mümkündür.

Hüquqşünasın  sözlərinə görə, burada əsas məsələ torpaq sahəsinin mühafizə və təhlükəsizlik zonalarının tələblərinə uyğun olub-olmamasıdır.

Adil Piriyev qeyd edib ki, əgər torpaq sahəsi təhlükəsizlik məsafələrinə uyğun yerləşirsə, məhkəmə qaydasında həmin əmlakın rəsmiləşdirilməsi mümkündür:

“Əgər torpaq sahəsi qaz xəttləri, neft quyuları, fontan və digər texniki obyektlərlə bağlı müəyyən edilmiş təhlükəsizlik məsafələrinə uyğundursa, vətəndaş məhkəmənin müsbət qərarı əsasında çıxarış ala bilər”.

Hüquqşünas  bildirib ki, qanunvericiliyə əsasən müəyyən məsafə tələbləri mövcuddur. Belə ki, qaz, lift, fontan və aktiv quyularla torpaq sahəsi arasında minimum 300 metr məsafə olmalıdır.

Pasiv və ya işləməyən quyularla torpaq sahəsi arasında isə ən azı 150 metr məsafə nəzərdə tutulur. Ləğv edilmiş quyular üçün bu məsafə 75 metr təşkil edir.

Hüquqşünasın sözlərinə görə, vətəndaşlar ilk növbədə aidiyyəti dövlət qurumlarına müraciət etməli və rəsmi imtina cavabı almalıdırlar:

“Bir çox hallarda vətəndaşlar birbaşa məhkəməyə müraciət edir. Halbuki əvvəlcə aidiyyəti qurumlara müraciət olunmalı, həmin torpaq sahəsinin rəsmiləşdirilməsi ilə bağlı rəsmi cavab və ya imtina məktubu alınmalıdır”.

Adil Piriyev qeyd edib ki, bundan sonra inzibati məhkəməyə müraciət edilir və proses hüquqi sənədlər əsasında davam etdirilir.

Onun sözlərinə görə, məhkəmə prosesində torpaq sahəsinin vəziyyəti, yerləşdiyi ərazi, texniki təhlükəsizlik tələbləri və faktiki istifadə vəziyyəti araşdırılır:

“Məhkəmə zamanı xüsusi sənədləşmə işləri aparılır, kadastr və texniki sənədlər hazırlanır, əraziyə baxış keçirilir. Bütün bu prosedurlar düzgün şəkildə icra olunarsa, vətəndaşın çıxarış alma şansı yüksəlir”.

Hüquqşünas  vurğulayıb ki, müsbət məhkəmə qərarından sonra vətəndaşlara çıxarış, texniki pasport və qiymətləndirmə sənədləri təqdim edilə bilər.

Adil Piriyev əlavə edib ki, son illərdə bu kateqoriyadan olan müraciətlərin sayı artıb:

“Xüsusilə Bakı və Abşeron ərazisində neft sahələrinə yaxın yaşayış massivlərində yaşayan vətəndaşlar bu problemlə tez-tez qarşılaşırlar. İnsanlar illərlə istifadə etdikləri torpaq sahələrini rəsmiləşdirmək istəyirlər”.

Hüquqşünas vətəndaşlara sənədləşmə prosesinə ciddi yanaşmağı və hüquqi prosedurları peşəkar şəkildə aparmağı tövsiyə edib:

“Əgər torpaq sahəsinin yerləşdiyi ərazi təhlükəsizlik normalarına uyğundursa, hüquqi yollarla çıxarış almaq mümkündür. Sadəcə proses düzgün aparılmalı və bütün sənədlər qanunvericiliyin tələblərinə uyğun hazırlanmalıdır”.

Hüquqşünas  sonda bildirib ki, belə hallarda vətəndaşların hüquqi yardım alması gələcək problemlərin qarşısını almaq baxımından olduqca vacibdir.

Turan Etibaroğlu

Həmçinin oxuyun

Bakıda yaşayanlara mühüm xəbər:Hansı dəyişiklik OLACAQ?

Yüksək vəzifəyə təyinat aldı  —  ƏMR İMZALANDI

Milli Hidrometeorologiya Xidməti xəbərdarlıq yaydı: 40 dərəcə isti olacaq

Elgiz Əkbər açıqladı: Yeni layihə gəlir -VİDEO