Qəzzada çadır və məktəblər VURULDU: 7 ölü

DÜNYA

658

10.01.2026, 10:14

Xəbərlərimizi Google-da izləyin

Yeniliklərdən dərhal xəbərdar olun

İsrail ordusunun Qəzza zolağında yerindən edilmiş mülki şəxslərin sığındığı çadırlara və məktəblərə endirdiyi hava zərbələri nəticəsində azı 7 fələstinli ölüb, 11 nəfər yaralanıb. Həlak olanlar arasında 2 uşaq da var.

Oxu24.com xarici KİV-lərə istinadən xəbər verir ki, Qəzzadakı Səhiyyə Nazirliyinin məlumatına görə, İsrail ordusu atəşkəsə baxmayaraq bölgədə hücumlarını davam etdirir. Bildirilib ki, Qəzza zolağının cənubundakı Xan Yunus şəhərində yerindən edilmiş şəxslərin çadırına pilotsuz uçuş aparatı (PUA) ilə endirilən zərbə nəticəsində 2-si uşaq olmaqla 4 mülki şəxs həyatını itirib.

Nazirliyin açıqlamasında, İsrail ordusunun Qəzza zolağının şimalında yerləşən Cəbəliyə Qaçqınlar Düşərgəsində məcburi köçkünlərin sığındığı bir məktəbi də PUA ilə vurduğu, nəticədə 1 nəfərin öldüyü, 8 nəfərin yaralandığı bildirilib. Hücumdan sonra məktəbdə yaranan yanğının nəzarət altına alındığı qeyd olunub.

Qəzza Səhiyyə Xidmətinin məlumatına əsasən, şimaldakı Beyt Lahiya qəsəbəsində köçkünlərin sığındığı Xəlifə məktəbi “kvadrokopter” tipli PUA ilə hədəfə alınıb, 3 nəfər yaralanıb. Bundan əlavə, Qəzzanın mərkəzində, Deyr əl-Bələh şəhərinin şimalında yerləşən çadıra endirilən hava zərbəsi nəticəsində 1 nəfər ölüb, bir neçə nəfər yaralanıb.

Qeyd edək ki, ABŞ Prezidenti Donald Tramp oktyabrın 9-da Misirdə aparılan danışıqlar zamanı İsrail və HƏMAS arasında Qəzzada atəşkəs planının ilkin mərhələsinin razılaşdırıldığını açıqlamışdı. Razılaşma İsrail hökumətinin təsdiqindən sonra 10 oktyabrda qüvvəyə minib. Buna baxmayaraq, İsrail ordusu atəşkəs rejimini tez-tez pozaraq Qəzza zolağında hücumlar həyata keçirir.

Həmçinin oxuyun