Parlamentin komitə sədri: Süni intellekt dövlət qulluqçusunu əvəz edə bilməz

CƏMİYYƏT

215

16.10.2026, 12:21

Xəbərlərimizi Google-da izləyin

Yeniliklərdən dərhal xəbərdar olun

Abunə ol

Süni intellekt dövlət qulluqçusunu əvəz edə bilməz.

Oxu24.com xəbər verir ki, bunu Milli Məclisin bu gün keçirilən iclasında “Dövlət xidmətləri haqqında” Azərbaycan Respublikasının 2025-ci il 31 oktyabr tarixli 279-VIIQ nömrəli Qanununun icrası ilə əlaqədar Azərbaycan Respublikasının bəzi qanunlarında dəyişiklik edilməsi barədə” qanun layihəsinin müzakirəsi zamanı parlamentin İnsan hüquqları komitəsinin sədri Zahid Oruc bildirib.

Zahid Oruc deyib ki, bir vaxtlar “dövlət xidməti” dedikdə vətəndaşın idarəyə gəlməsi, hakimiyyət təmsilçisi və məmurla əyani görüşməsi, sənədlərini şəxsən təqdim etməsi və cavab gözləməsi başa düşülürdü: “Əlbəttə, birbaşa insan ünsiyyəti, fiziki qəbul və fərdi müraciət imkanları heç vaxt inkar olunmur və olunmamalıdır. Lakin müasir dövlətin gücü həm də vətəndaşın vaxtına qənaət etməsində, onu idarələr arasında zaman itirmək məcburiyyətindən azad etməsində və xidmətləri daha əlçatan etməsindədir. Azərbaycan ASAN xidmət modeli ilə mühüm yeniliklərə imza atıb. İndi elektron xidmətlər və EHİS üzərindən elektron kabinet imkanlarının genişləndirilməsi dövlət idarəçiliyində növbəti mərhələdir. Hesab edirəm ki, gələcək mərhələ süni intellekt əsaslı dövlət xidmətləri olacaq. Vətəndaşın müraciətini anlayan, qanunvericiliyi izah edən, tələb olunan sənədləri müəyyənləşdirən və müxtəlif qurumların xidmətlərini əlaqələndirən intellektual platformalar dövlət idarəçiliyinin ayrılmaz hissəsinə çevrilə bilər. Lakin süni intellekt dövlət qulluqçusunun işini asanlaşdırmalı, dövlətin vətəndaş qarşısındakı hüquqi məsuliyyətini isə əvəz etməməlidir. Dövlət xidmətləri daha çox idarə yaratmağı tələb etmir, vətəndaşın idarəyə müraciət ehtiyacını azaltmaqdadır. Yeni rəqəmsal platformların Azərbaycanda dövlət xidmətinin effektivliyni artıracağına inanırıq”.

Həmçinin oxuyun