“Din dövlətdən ayrıdır, məktəb də dindən!” – Eynulla Mədətlidən müzakirələrə CAVAB  

Məktəblərdə vahid geyim qaydalarına əməl olunması şagirdlər arasında nizam-intizamın qorunması və bərabər təhsil mühitinin formalaşdırılması baxımından ən mühüm məsələlərdən biri olaraq diqqət çəkir. Son günlərdə cəmiyyətdə geniş müzakirələrə səbəb olan bu mövzu həm də təhsil müəssisələrində sağlam mühitin təmin edilməsi istiqamətində atılan əsas addımlardandır. Bəzi maraqlı dairələr, xüsusilə də qonşu ölkələrin müəyyən qrupları tərəfindən bu qərarın süni şəkildə siyasiləşdirilməsinə cəhdlər göstərilir. Halbuki məktəbli forması dünyanın bir çox qabaqcıl ölkələrində uğurla tətbiq olunan ümumi təcrübədir. Azərbaycanda, o cümlədən Naxçıvan Muxtar Respublikasında bu qayda artıq iyirmi ildən çoxdur ki, uğurla reallaşdırılır. Buna baxmayaraq, bəzi dairələr məsələni hicab məsələsi ilə əlaqələndirərək qərəzli kampaniya aparmağa çalışırlar. Lakin ölkə qanunvericiliyində və Konstitusiyasında hər hansı hicab qadağasından söhbət gedə bilməz. 

Cəmiyyətimizdə hicablı qadınlar həm təşkilatlarda, həm də ictimai yerlərdə sərbəst şəkildə fəaliyyət göstərirlər. Təhsil müəssisələrində isə hər bir şagirdin və müəllimin ümumi qaydalara tabe olması zəruridir.

Mövzu ilə bağlı Oxu24.com-a açıqlama verən Tarix elmləri doktoru, Fəlsəfə və Sosiologiya İnstitutunun elmi işlər üzrə direktor müavini Eynulla Mədətli məsələnin kökündə duran əsas məqamları və həqiqətləri diqqətə çatdırıb.

Eynulla Mədətli bildirib ki, məktəbli forması haqqında Azərbaycan hökumətinin qərarının müəyyən maraqlı dairələr, xüsusilə də qonşu ölkələrin müəyyən dairələri tərəfindən siyasiləşdirilməsi və hay-küylü bir kampaniyaya çevrilməsi cəhdləri qətiyyən yolverilməzdir.

Sədr müavini qeyd edib ki, məktəbli forması dünyanın bir çox ölkələrində tətbiq olunan üsuldur. Azərbaycanda, o cümlədən Naxçıvan Muxtar Respublikasında artıq 20 ildən çoxdur ki, bu təcrübə mövcuddur. Müəllimlərin də, şagirdlərin də vahid forması var və heç kimin ağlına gəlməyib ki, buna etiraz etsin. 

“Məsələnin hicabla əlaqələndirilməsi qərəzlidir”

Eynulla Mədətli qeyd edib ki, Azərbaycan hökumətinin bu qərarının hicabla əlaqələndirilməsinin heç bir mənası yoxdur. Bu, açıq-aşkar uydurma və bədniyyətlə edilmiş cəhddən başqa bir şey deyil. Çünki nə Azərbaycanın Konstitusiyasında, nə də hər hansı bir qanununda hicab qadağası deyilən bir şey mövcuddur. Hicablı qadınlar cəmiyyətimizdə müəssisələrdə, təşkilatlarda, ictimai yerlərdə hər yerdə var və cəmiyyətin bərabərhüquqlu üzvüdürlər.

Müsahib vurğulayıb ki, vahid geyim sosial bərabərlik və ədalət yaratmaqla həm şagirdləri bərabərləşdirir, ortadakı sosial status, zənginlik və yoxsulluq kimi fərqləri aradan qaldırır:

“Müəllimlərin də vahid geyimdə olması bu sahədə hər hansı psixoloji sıxıntı və ya fərqliliklərin yaranmasına imkan vermir.Vahid geyim şagirdlərin və müəllimlərin diqqətini daha çox təhsilə yönəltməsini təmin edən nizam-intizam və məsuliyyət vasitəsidir”.

Sonda E.Mədətli əlavə edib ki, Azərbaycan sekulyar dövlətdir, sivil yolla gedən dünyəvi dövlətdir. Din dövlətdən ayrıdır, məktəb isə dindən ayrıdır. Buna görə də Azərbaycan hökumətinin qərarı son hərfinə qədər yerinə yetirilməlidir və müəyyən narazı şəxslər də gec-tez bunun əhəmiyyətini başa düşəcəklər.

Çimnaz Telmanqızı

Həmçinin oxuyun

Kombi istifadə edənlərin NƏZƏRİNƏ 

Türkiyə Prezidentinin Şuşada rəsmi qarşılanma mərasimi keçirilir - CANLI 

Ərdoğanın Azərbaycan səfərinin YENİ DETALLARI

Polkovnik-leytenant: Müharibə dövründə Prezidentin Xalqa müraciətlərini ayrıca qiymətləndirmək lazımdır