“Vizasız rejim turizm axınını artırmaq üçün yeni fürsətlər yaradır” : EKSPERT

CƏMİYYƏT

127

09.07.2026, 21:18

Azərbaycan son dövrlərdə xarici siyasətində və turizm strategiyasında mühüm addımlar ataraq Çin, Mərakeş, Maldiv və İordaniya kimi müxtəlif coğrafiyaları əhatə edən ölkələrlə vizasız rejimə keçid edib. Bu qərarlar həm yerli vətəndaşların xaricə səfərlərini asanlaşdırır, həm də həmin ölkələrdən Azərbaycana turist axınını stimullaşdırır.

Vizaların ləğv olunması ölkənin turizm potensialının reallaşdırılması və beynəlxalq müstəvidə cəlbediciliyinin artırılması istiqamətində mühüm təkanverici qüvvə rolunu oynayır.

Yeni rejim bütövlükdə turizm ekosisteminə daxil olan tərəfdaşlar üçün fərqli imkanlar və yeni iqtisadi perspektivlər vəd edir. Bu prosesin sahənin əsas hərəkətverici qüvvələrinə hansı dividendlər qazandıracağı isə hazırda sektorun ən çox müzakirə etdiyi mövzulardandır.

Mövzu ilə bağlı turizm eksperti Ceyhun Aşurov Oxu24.com-a fikirlərini bölüşərək bu addımın əhəmiyyətini və sektora təsirlərini belə şərh edib:

“Vizasız rejimin tətbiq olunması, şübhəsiz ki, müsbət dəyərləndirilməlidir. Lakin yadda saxlamaq lazımdır ki, vizanın aradan qaldırılması ölkəyə turistlərin gəlməsini artırmaq üçün mövcud olan faktorlardan yalnız biridir. Bu halda ölkəmizə gələn turistlərin sayında ciddi artım əldə edə bilməyimiz üçün biz gəlimi daha çox əlverişli hala gətirməliyik. Bu, həm vizalarla bağlı məsələləri, həm birbaşa uçuşların olmasını, həm də uçuşların özlərinin — yəni nəqliyyat xərclərinin optimallaşdırılmasını və əlverişli qiymət balansının yaradılmasını tələb edir”.

Ekspertin sözlərinə görə, bütövlükdə hotellər, aviaşirkətlər və turizm şirkətləri üçün böyük imkanların yaranması birbaşa olaraq əlverişli qiymətlərin və stimullaşdırıcı şərtlərin təqdim olunmasından asılıdır:

“Yalnız vizasız rejim deyil, eyni zamanda nəqliyyat xərclərinin aşağı salınması və cəlbedici şərtlərin vəhdəti ölkə turizminin dinamik inkişafına birbaşa təsir göstərən çox vacib məsələlərdəndir”.

Yekun olaraq qeyd edək ki, vizasız rejimin tətbiqi Azərbaycanın qlobal turizm bazarında mövqeyini gücləndirmək üçün unikal şansdır. Ekspertin də vurğuladığı kimi, bu imkanlardan maksimum yararlanmaq və real nəticə əldə etmək üçün təkcə qapıları açmaq kifayət deyil, həm də ölkədaxili xidmət və xüsusilə nəqliyyat infrastrukturunu daha əlçatan etmək lazımdır. Yaxın gələcəkdə aviaşirkətlərin qiymət siyasətində və birbaşa uçuşların sayında müsbət dəyişikliklərin edilməsi, yeni açılan bazarlardan ölkəmizə gələcək turist axınının davamlılığını təmin edə bilər. Sektorun bu çağırışlara necə reaksiya verəcəyini və yaranan yeni iqtisadi perspektivləri necə dəyərləndirəcəyini isə zaman göstərəcək.