Bakının su basmayan əraziləri: Ev alarkən nələrə diqqət etməliyik?

CƏMİYYƏT

856

06.04.2026, 19:49

İntensiv yağıntılar yenidən ölkənin müxtəlif bölgələrində ciddi fəsadlara səbəb olub. Bir sıra yaşayış evləri və obyektlər su altında qalıb. Amma ortaya çıxan mənzərə göstərir ki, yaranan problemlər təkcə təbii səbəblərdən qaynaqlanmır. Belə ki, bəzi vətəndaşlar ev alarkən və ya tikərkən ərazinin infrastrukturunu, relyefini və ümumi vəziyyətini nəzərə almırlar. Nəticədə kanalizasiya sistemi olmayan, vaxtilə gölməçə və bataqlıq olmuş sahələrdə inşa edilən evlər yağışda su altında qalır.

Bəs ev alarkən nələrə diqqət etmək lazımdır?

Oxu24.com mövzu ilə bağlı əmlak eksperti Elnur Azadov Bakupost.az -a açıqlamasında bildirib ki, fərdi yaşayış evi alarkən sözsüz ki, ilk növbədə kanalizasiya təchizatı olan yerlərdən ev almaq daha uyğundur:

“Birinci tövsiyəm budur. Kanalizasiya sistemi olan ərazilərdə subasma riski minimuma enir. Bundan əlavə, ərazinin relyefi də nəzərə alınmalıdır. Çökəkliklərdə yerləşən sahələrdə güclü yağış zamanı suyun yığılması qaçılmazdır. Bu kimi yerlərdə risk daha çoxdur”.

Ekspertin sözlərinə görə, ikinci əsas məsələ şəhərsalma planına uyğun ərazilərin seçilməsidir:

“Vətəndaşlar yaşayış məntəqəsi təyinatlı torpaqlara üstünlük verməlidirlər. Bu torpaqlar qanuni şəkildə əldə olunur və çıxarış sənədi olur. Hətta mövcud vəziyyətdə kanalizasiya xətti yoxdursa, qanunvericiliyə uyğun olaraq dövlət vətəndaşları kommunikasiya xətləri ilə təmin etməlidir.

Artıq 2025-ci ilin sonlarında Bakı şəhərində kanalizasiya sistemi olmayan ərazilərdə mini kollektorların tikintisi planlaşdırılıb. Bu isə gələcəkdə həmin ərazilərə kanalizasiya xətlərinin çəkilməsi üçün şərait yaradır. Perspektivdə vətəndaşlar bu məqamları da nəzərə ala bilərlər”.

Əmlak eksperti Elnur Fərzəliyev isə bildirib ki, daşınmaz əmlak alarkən ilk növbədə çıxarış sənədi yoxlanılmalıdır:

“Subasma halları daha çox çıxarışsız evlərin yerləşdiyi ərazilərdə baş verir. Bunun səbəbi həmin torpaqların yaşayış təyinatlı olmamasıdır. Əkin-biçin və ya kənd təsərrüfatı üçün nəzərdə tutulmuş torpaqlarda kommunikasiya xətləri ya olmur, ya da məhdud olur.Hər hansı əraziyə kommunikasiya xətlərinin çəkilməsi üçün həmin ərazinin təyinatı yaşayış məntəqəsi torpaqları olmalıdır. Eyni zamanda, mövcud evlərə kommunikasiya xətlərinin çəkilməsi üçün onların qanunvericiliyə uyğun çıxarışı olmalıdır”.

Ekspert qeyd edib ki, əvvəllər göl və bataqlıq olan ərazilərdə tikilən evlər daha yüksək risk altındadır:

“Yağış suları təbii olaraq həmin ərazilərə axırdı.Təəssüf ki, zamanla bu göllər qurudulub və onların üzərində fərdi yaşayış evləri tikilib. Bu isə su axınlarının qarşısını alıb və nəticədə sular vətəndaşların mənzillərinə dolur.

Bu baxımdan mənzil alarkən ilk növbədə çıxarışa və yerləşməyə diqqət edilməlidir”.

Həmçinin oxuyun