Krediti olanlara vacib xəbər!

CƏMİYYƏT

5767

05.03.2026, 23:39

Bank olmayan kredit təşkilatları borclunun yaxınlarına zəng edə bilərmi? – Hüquqi izah

Son dövrlərdə vətəndaşlar tərəfindən ən çox verilən suallardan biri bank olmayan kredit təşkilatlarının (BOKT) borclunun ailə üzvlərinə, iş yoldaşlarına və ya qonşularına zəng edərək təzyiq göstərməsi ilə bağlıdır.

Oxu24.com xəbər verir ki,hüquqşünasların sözlərinə görə, kredit müqaviləsi yalnız borclu ilə kredit təşkilatı arasında bağlanır və hüquqi məsuliyyət də yalnız həmin şəxsə aiddir (zamin varsa, yalnız zamini əhatə edir).

Borclunun ailə üzvlərinə, dostlarına və ya digər üçüncü şəxslərə zəng edilməsi qanunvericiliyin tələblərinə uyğun deyil.

“Banklar haqqında” qanunvericiliyə əsasən, kredit məlumatları bank sirri hesab olunur. Eyni zamanda, kredit borcu fərdi məlumat sayılır və “Fərdi məlumatlar haqqında” qanunla qorunur.

Bu məlumatların üçüncü şəxslərə açıqlanması və ya həmin şəxslərə təzyiq məqsədilə istifadə olunması hüquq pozuntusudur.

Borclunun yaxınlarına zəng edilərək hədə-qorxu gəlmək, polis adı ilə təhdid etmək, iş yerinə gəlməklə qorxutmaq kimi hallar qanunsuz təzyiq formasıdır və yolverilməzdir.

Belə hallarla üzləşən vətəndaşlara rəsmi qaydada Mərkəzi Banka, eləcə də müvafiq nəzarət və hüquq-mühafizə orqanlarına müraciət etmək tövsiyə olunur. Qanun borclunun hüquqlarını qoruyur və üçüncü şəxslərə təzyiq göstərilməsi hüquqi məsuliyyət yarada bilər.

Nigar

Həmçinin oxuyun