Yubiley günündə Əbülfəz Qarayevdən açıqlama: "Fəaliyyətimi davam etdirirəm"– ÖZƏL  

Bu gün Azərbaycanın sabiq mədəniyyət naziri Əbülfəs Qarayevin 70 yaşı tamam olur.

Yubileyi münasibətilə Əbülfəs Qarayev Oxu24.com-a açıqlama verib.

Sabiq nazir 70 yaşında özünü gümrah hiss etdiyini, fəaliyyətini davam etdirdiyini və müxtəlif beynəlxalq tədbirlərdə iştirak etdiyini bildirib.

“Yubileyimi təbrik etdiyiniz üçün təşəkkür edirəm. 70 yaşımda özümü kifayət qədər gümrah və yaxşı hiss edirəm. Fəaliyyətimi davam etdirir, işimin başında olur, dərslərimi deyirəm. Eyni zamanda, beynəlxalq simpoziumlarda və müxtəlif konfranslarda iştirak edir, elmi və mədəni sahədə keçirilən tədbirlərdə fəal olmağa çalışıram. Fürsət olduqca bilik və təcrübəmi bölüşür, fəaliyyətimi davam etdirirəm”, – deyə Əbülfəs Qarayev bildirib.

Yubileyini necə qeyd etdiyinə gəlincə, sabiq nazir bu günü ənənəvi olaraq ailə üzvləri və nəvələri ilə birlikdə, sadə şəkildə keçirdiyini söyləyib:

“Həmişə olduğu kimi, sadə şəkildə ailəmlə, nəvələrimlə birgə qeyd edirəm”.

Qeyd edək ki, Əbülfəs Mürsəl oğlu Qarayev 13 noyabr 1956-cı ildə Bakı şəhərində görkəmli Qarayevlər ailəsində anadan olub. Atası Əməkdar elm xadimi Mürsəl Qarayev, əmisi isə dünya şöhrətli bəstəkar Qara Qarayevdir.

O, 1963-cü ildə Bakı şəhərindəki 23 nömrəli tam orta məktəbə daxil olub, 1973-cü ildə həmin məktəbi bitirib. 1973–1978-ci illərdə Azərbaycan Pedaqoji Xarici Dillər İnstitutunda ali təhsil alıb. 1978-ci ildə Saatlı rayonunda M. Əzizbəyov adına orta məktəbdə ingilis dili müəllimi kimi əmək fəaliyyətinə başlayıb.

Əbülfəs Qarayev 1994–2001-ci illərdə gənclər və idman naziri, 2001–2006-cı illərdə gənclər, idman və turizm naziri, 2006–2018-ci illərdə mədəniyyət və turizm naziri vəzifələrində çalışıb. 2018-ci ildə Azərbaycan Respublikasının mədəniyyət naziri təyin edilib, 2020-ci il mayın 21-də isə həmin vəzifədən azad olunub.

Turan Etibaroğlu

Həmçinin oxuyun

Bakıda kütləvi dava: bıçaqlananlar var – Adlar 

Yubiley günündə Əbülfəz Qarayevdən açıqlama: "Fəaliyyətimi davam etdirirəm"– ÖZƏL  

Nəvəsinin andiçməsindən sonra meyiti tapılan kişi necə ölübmüş? - DETALLAR

Nazir şad xəbəri verdi, “hamı görəcək” dedi – Bizi nələr gözləyir?