Qabiliyyət tələb edən bəzi ixtisaslar üzrə müsabiqə şərtləri dəyişdirilib 

2026/2027-ci tədris ili üçün ali və orta ixtisas təhsili müəssisələrində xüsusi qabiliyyət tələb edən bəzi ixtisaslar üzrə müsabiqə şərtlərində dəyişiklik edilib.

Dövlət İmtahan Mərkəzindən (DİM) Oxu24.com-a bildirilib ki, yeni qərara əsasən, xoreoqrafiya sənəti ixtisası üzrə bakalavriat səviyyəsində təhsil almaq istəyən abituriyentlər üçün müsabiqəyə buraxılmaq məqsədilə minimum 50 test balı tələb olunacaq. Aktyor sənəti ixtisası üzrə isə bu göstərici 100 bala qaldırılıb.

Orta ixtisas təhsili müəssisələrində rəqs müəllimliyi ixtisası üzrə 11 illik təhsil bazasında qəbul olmaq istəyənlər üçün minimum test balı 40 olaraq müəyyən edilib. Həmin ixtisas üzrə 9 illik təhsil bazasında qəbul üçün isə 50 bal tələb olunur. Xoreoqrafiya sənəti ixtisası üzrə orta ixtisas təhsili səviyyəsində, 9 illik təhsil bazasında da müsabiqə şərti 50 test balıdır.

Bundan əlavə, bakalavriat təhsil səviyyəsi üzrə xoreoqrafiya sənəti ixtisasının ifaçılıq fənni üzrə qabiliyyət imtahanında abituriyentlər (subbakalavrlar) 3 fərqli xarakterli rəqs ifa edəcəklər.

Xoreoqrafiya sənəti ixtisasının milli rəqs və rəqs müəllimliyi sahələri üzrə imtahana girənlər üçün tələblər belədir: qızlar və oğlanlar bir lirik rəqs ifa etməlidirlər. Oğlanlar əlavə olaraq “Yallı”, “Qazağı”, “Şalaqoy” və ya “Qaytağı” rəqslərindən ikisini, qızlar isə “Yallı”, “Qaval”, “Nəlbəki” və ya “Yaylıqlarla rəqs” növlərindən ikisini təqdim edəcəklər.

Həmçinin oxuyun

Bakıda hava bu tarixdə kəskin dəyişir: Qar yağacaq

Bakıda dumanlı gecə ilə bağlı XƏBƏRDARLIQ

Manatla bağlı gözlənilməz DƏYİŞİKLİK: Banklara dollar "yağır" 

Bu şəxslər əsgərliyə gedəndə 3 500 manat pul alacaqlar

Balet pedaqogikası sahəsi üzrə namizədlər “Korsar”, “Don Kixot”, “Jizel”, “Şelkunçik”, “Min bir gecə”, “Qız qalası” və “Yeddi gözəl” baletlərindən seçilmiş 3 variasiya ifa edəcəklər.

Modern rəqs sahəsi üzrə isə müasir rəqs cərəyanlarını əhatə edən, müxtəlif xarakterli 3 rəqs təqdim olunmalıdır.

Qeyd edək ki, xoreoqrafiya sənətinin baletmeyster sahəsi üzrə qabiliyyət imtahanında hər hansı dəyişiklik edilməyib.

Teatr, kino və xoreoqrafiya istiqamətinin ali və orta ixtisas təhsili müəssisələrinin xüsusi qabiliyyət tələb edən ixtisasları haqqında bütün məlumatlar “Abituriyent” jurnalının xüsusi buraxılışı olan “Teatr, kino və xoreoqrafiya sənəti” adlı vəsaitdə nəşr ediləcək. Qabiliyyət imtahanlarına hazırlaşmaq və ətraflı məlumat almaq üçün DİM-in nəşrlərini və saytını izləmək tövsiyə olunur.