Baş nazirdən pensiyalarla bağlı QƏRAR: Dəyişən nədir?

“Zabit heyətinə mənsub şəxslərə, gizirlərə, miçmanlara, müddətdən artıq həqiqi hərbi xidmət hərbi qulluqçularına, daxili işlər, ədliyyə, gömrük, miqrasiya, fövqəladə hallar və vergi orqanlarının rəis və sıravi heyətinə mənsub şəxslərə və onların ailələrinə pensiya təyin edilib verilməsi üçün uzun müddət xidmət vaxtının hesablanması qaydası haqqında” Nazirlər Kabinetinin Qərarında dəyişiklik edilib.

Oxu24.com xəbər verir ki, Baş nazir Əli Əsədovun bununla bağlı müvafiq Qərarı 2026-cı il yanvarın 1-dən qüvvəyə minib.

Qərara əsasən, həqiqi hərbi xidmətdə (qulluqda) olmanın son yaş həddinə çatmasına, xəstəliyinə və ya ştatların ixtisarına görə hərbi xidmətdən buraxılan hərbi qulluqçulara (hərbi rütbələrdən məhrum edilmiş hərbi qulluqçular, müddətli həqiqi hərbi xidmət hərbi qulluqçuları istisna olmaqla) və ədliyyə orqanlarının rəis və sıravi heyətinə mənsub şəxslərə beş aylıq vəzifə və rütbə maaşı həcmində işdənçıxarma müavinəti ödəniləcək.

Məhkəmənin qərarı ilə xidmətdən buraxılanlar istisna olmaqla, hərbi xidmətdən başqa əsaslara görə buraxılmış hərbi qulluqçulara və ədliyyə orqanlarının rəis və sıravi heyətinə mənsub şəxslərə iki aylıq vəzifə və rütbə maaşı həcmində işdənçıxarma müavinəti ödəniləcək.

Pensiya hüququ olmadan xidmətdən buraxılan, təqvimi xidmət müddəti dörd ildən az olan gizirlərə, miçmanlara, müddətdən artıq həqiqi hərbi xidmət hərbi qulluqçularına və ədliyyə orqanlarının kiçik rəis və sıravi heyətinə mənsub şəxslərə bir aylıq vəzifə və rütbə maaşının 50 faizi həcmində, təqvimi dörd il və daha artıq xidmət edənlərə dörd il xidmətə görə bir aylıq vəzifə və rütbə maaşı və dörd ildən artıq xidmətin hər tam təqvim ili üçün əlavə olaraq bir aylıq vəzifə və rütbə maaşının 20 faizi həcmində, lakin ümumi məbləği iki aylıq vəzifə və rütbə maaşından çox olmamaqla işdənçıxarma müavinəti ödəniləcək.

Həmçinin, işdənçıxarma müavinəti hərbi qulluqçulara və ədliyyə orqanlarının orta, böyük və ali rəis heyətinə mənsub şəxslərə axırıncı vəzifəsi, hərbi və ya xüsusi rütbə üzrə maaşlardan, ədliyyə orqanlarının kiçik rəis və sıravi heyətinə mənsub şəxslərə axırıncı vəzifəsi üzrə verilən maaşdan hesablanacaq.

Həmçinin oxuyun

"İmtahanda ixtisaslarına uyğun olmayan suallar verilir" - ŞİKAYƏT 

AMEA açıqlama yaydı, İsa Həbibbəylini rüsvay etdi 

Bank aliment pulunu kredit borcuna görə tuta bilərmi? – Hüquqşünas açıqladı  

Tərxis olunan hərbi qulluqçular üçün MÜHÜM XƏBƏR: Müddət uzadıldı  —  RƏSMİ

Gizirlərin, miçmanların, müddətdən artıq həqiqi hərbi xidmət hərbi qulluqçularının, ədliyyə orqanlarının kiçik rəis və sıravi heyətinə mənsub şəxslərin xidmət müddətində fasilələr olduğu halda, onlara işdənçıxarma müavinəti yalnız sonuncu xidmət müddəti nəzərə alınmaqla veriləcək.

Bununla yanaşı, pensiya hüququ olmadan həqiqi hərbi xidmətdə və ya ehtiyatda olmanın son yaş həddinə çatmasına, xəstəliyinə və ya ştat ixtisarına görə həqiqi hərbi xidmətdən buraxılan hərbi qulluqçulara işdənçıxarma müavinətinin hərbi rütbə üzrə verilməsi hərbi xidmətdən buraxıldığı gündən etibarən bir il ərzində davam edəcək.

Hərbi və xüsusi rütbə nəzərdə tutulmayan digər dövlət orqanlarında (qurumlarında), müəssisə və təşkilatlarda işləyən, iş yeri və orta aylıq əməkhaqqı saxlanılan səfərbərlik üzrə hərbi xidmətə (toplanışa) çağırılmış hərbi qulluqçulara və ədliyyə orqanlarının rəis və sıravi heyətinə mənsub şəxslərə, habelə müddətli həqiqi hərbi xidmətdən birbaşa zabit hərbi rütbəsi verilməklə buraxılmış şəxslərə işdənçıxarma müavinəti verilməyəcək.

Məlumat üçün bildirək ki, Nazirlər Kabinetinin sözügedən Qərarının bundan əvvəl qüvvədə olan variantında daxili işlər və ədliyyə orqanları bərabər tutulurdu. Belə ki, yuxarıdakı bəndlərdə ədliyyə orqanlarına aid edilənlər daxili işlər orqanlarına da şamil olunurdu. Lakin yeni Qərarla “daxili işlər” sözü yuxarıdakı maddələrdən çıxarılıb.