Stent qoyduranlar və təzyiq xəstələri bu xətanı edir! —  AÇIQLAMA

Müasir dövrdə ürək-damar xəstəlikləri dünyada və ölkəmizdə ən çox yayılan, ciddi fəsadlara yol açan sağlamlıq problemlərindən biridir. Xüsusilə stent qoyulmuş, əməliyyat olunmuş və ya təzyiqdən əziyyət çəkən pasiyentlərin əksəriyyəti müalicə kursunu yarımçıq saxlayaraq həyatlarını böyük risk altına atırlar. Çox vaxt xəstələr özlərini bir qədər yaxşı hiss edən kimi dərman qəbulunu dayandırır və xəstəliyin tam sağaldığını zənn edirlər. Lakin mütəxəssislər bildirirlər ki, ürək patologiyaları xroniki xarakter daşıyır və müalicənin dayandırılması geriqayıtmaz ağır nəticələrə gətirib çıxarır. Əksər hallarda dərmanı kəsdikdən sonra vəziyyəti kəskin pisləşən şəxslər yenidən müalicəyə başlasalar da, bir daha əvvəlki vəziyyətə bərpa oluna bilmirlər. Bəs ürək xəstələri dərmanları nə qədər qəbul etməli və hansı kritik səhvlərə yol verməməlidirlər?

Mövzu ilə bağlı Oxu24.com-a tanınmış mütəxəssis, kardioloq Dr. Üzeyir Rəhimov açıqlama verib.

Üzeyir Rəhimov bildirib ki, ürək xəstəliklərinin əksəriyyəti qrip kimi sağalıb keçən xəstəlik deyil, ömürboyu davam edən xroniki prosesdir:

“Ürək xəstəliklərinin böyük çoxluğu xroniki xəstəliklərdir. Yəni qrip kimi sağalıb qurtarmır. Buna görə də ürək üçün müalicəni davamlı istifadə etmək lazımdır.

Bizə ən çox ünvanlanan suallardan biri stent qoyulduqdan və ya ürək əməliyyatından sonra dərmanların kəsilməsi ilə bağlıdır. Xəstələr bilməlidir ki, stent qoymaq və ya əməliyyat olunmaq ürək-damar problemini tam həll etmir, sadəcə mövcud olan daralmanı ortadan qaldırır”.

Onun sözlərinə görə, damardakı ateroskleroz (kirəclənmə) prosesi davam etdiyi üçün yağəridici və qandurulducu dərmanları ömür boyu istifadə etmək mütləqdir:

“İkinci ən çox rastlaşdığımız məsələ ürək çatışmazlığıdır. Pasiyentlər bir az yaxşılaşan kimi dərmanları, xüsusən də sidikqovucu preparatları içmək istəmirlər. Amma dərmanı kəsdikdən sonra vəziyyət kəskin pisləşir. Pisləşdikdən sonra dərmana yenidən başlasalar belə, heç vaxt əvvəlki vəziyyətə qayda bilmirlər, daha geridə qalırlar”.

Həkim qeyd edib ki, üçüncü məsələ isə təzyiq və xolesterindir. Təzyiq və xolesterin dərmansız düşmür. Xüsusilə xolesterinin qida və idmanla əlaqəsi cəmi 10%-dir, 90%-ni orqanizmimiz özü sintez edir. Buna görə də, əgər ürəyinizdə problem varsa, təzyiq, xolesterin və ümumiyyətlə ürək dərmanları daima qəbul edilməlidir.

Nigar

Həmçinin oxuyun

Azərbaycana hücumu onlar təşkil edibmiş -DETALLAR

Guya DTX-dən zəng gələcək - Qanunsuz tələblərə inanmayın! 

Azərbaycanda tanınmış jurnalist VƏFAT ETDİ

 Milli Hidrometerologiya Xidmətindən AÇIQLAMA: İsti hava kütlələri...