Öd kisəsində daş olanların NƏZƏRİNƏ: Lazerlə daş qırmaq yalandır, dərmanlar isə TƏHLÜKƏLİDİR — Həkimdən XƏBƏRDARLIQ

TİBB

478

25.08.2026, 14:59

Xəbərlərimizi Google-da izləyin

Yeniliklərdən dərhal xəbərdar olun

Müasir dövrdə öd kisəsi xəstəlikləri və xüsusilə öd daşı problemi əhalinin ən çox üzləşdiyi tibbi məsələlərdən biridir. Lakin son zamanlar sosial şəbəkələrdə və ictimaiyyət arasında öd kisəsindəki daşların guya "əməliyyatsız və lazerlə qırılması" və ya müxtəlif preparatlarla "əridilərək yox edilməsi" ilə bağlı yanlış və cəmiyyəti aldadan məlumatlar geniş yayılmaqdadır. Bir çox pasiyentlər cərrahi müdaxilədən qaçmaq və organdan məhrum olmamaq üçün elmi əsası olmayan, ciddi riski özündə əks etdirən təhlükəli üsullara üstünlük verirlər. Mütəxəssislər xəbərdarlıq edirlər ki, tibbi cəhətdən əsaslandırılmamış bu addımlar pasiyentin həyatı üçün böyük təhlükə mənbəyinə çevrilə bilər. Çünki öd kisəsindəki daşların düzgün müalicə olunmaması və ya nəzarətsiz kiçildilməsi ağır klinik fəsadlara, hətta təcili cərrahi müdaxilələrə yol açır.

Məsələ ilə bağlı Oxu24.com-a açıqlama verən həkim Dr. Səməd Həsənli pasiyentləri diqqətli olmağa çağıraraq bildirib ki, sağlamlıq üzərində təcrübələr aparmaq yolverilməzdir:

"Bizim pasiyentlərə tövsiyə etdiyimiz elmi sübut olunmuş və zərəri minimum olan müalicə üsullarıdır. Müasir tibbdə öd kisəsindəki daşları lazerlə qırmaq deyə bir üsul yoxdur. Bu daşları dərmanla əritmək də tövsiyə olunmur. Çünki kiçilmiş daşlar ana öd yoluna düşər, ciddi sarılığa və mədəaltı vəzin iltihabına (pankreatit) səbəb ola bilər”.

O qeyd edib ki, bu kimi hallarda ən müasir və güvənli üsul isə el dilində lazer dediyimiz laparoskopik yolla öd kisəsinin bədəndən uzaqlaşdırılmasıdır.

Həkim onu da əlavə edib ki, öd kisəsində daş olan şəxslər özbaşına müalicə üsullarından uzaq durmalı, ağrı və narahatlıq hiss etdikdə dərhal peşəkar cərrah-mütəxəssislərə müraciət etməlidirlər.

Həmçinin oxuyun