Dodaqdakı uçuqlar gözə keçə bilər — Həkimdən AÇIQLAMA

TİBB

342

20.08.2026, 13:40

Xəbərlərimizi Google-da izləyin

Yeniliklərdən dərhal xəbərdar olun

İmmunitet zəifləməsi, soyuqdəymə və ya güclü stres zamanı dodaq kənarında yaranan uçuqlar ciddi təhlükə mənbəyi ola bilər. Mütəxəssislərin bildirdiyinə görə, uçuqlara səbəb olan herpes virusu uşaqlıqdan bədəndə yaşayır və orqanizm zəiflədikdə aktivləşir. Ən böyük risk isə bu virusun infeksiya şəklində gözlərə keçmə ehtimalıdır. Dodaqdakı uçuq nahiyəsinə toxunduqdan sonra gözləri ovuşdurmaq görmə qabiliyyətinin itirilməsinə aparan ağır fəsadlar yarada bilər.

Mövzu ilə bağlı Oxu24.com-a açıqlama verən Dr. Benyamin Kərimov məsələnin detallarını belə izah edib:

"Dodağın kənarında bəzən soyuqdəyəndə və yaxud qorxanda, immunitetimiz düşəndə uçuqlamalar görürük. Bunlar herpesdir və gözə düşə bilər. Dodaq kənarından çıxan uçuqlar, hansı ki, bizim immun sistemimiz zəifləyəndə baş verir, həmin herpes virusudur”.

Onun sözlərinə görə, Herpes virusları çox təhlükəli virusdur:

“Əslində bizim hamımızda herpes virusu var. Uşaqlıqdan biz suçiçəyi xəstəliyi keçirəndən sonra herpes bizim onurğa mayemizdə yaşayır və haçan ki, bizim immun sistemimiz zəiflədi — möhkəm soyuqladıq, vitaminsiz qaldıq və yaxud qorxduq, stres keçirtdik — bu zaman həmin o herpes virusları özlərini uçuq kimi büruzə verə bilir. Həmin an diqqətli olmaq lazımdır. Əgər siz həmin yerləri, uçuqları qaşıyıb, sonradan onu gözünüzə vursanız, onda həmin o herpes gözünüzə keçə bilər və herpes keratiti yarada bilər”.

Sonda həkim əlavə edib ki, Herpes keratiti isə korluğa aparan bir xəstəlikdir. Çox təhlükəli bir xəstəlikdir, ona görə çox diqqətli olmaq lazımdır. Həmin vaxtları gözünüzü ovxalamaq olmaz.

Həmçinin oxuyun