Bipolyar pozuntu müalicə olunurmu? – Psixiatrdan vacib AÇIQLAMA  

Bipolyar affektiv pozuntu müasir dövrdə ən çox müzakirə olunan psixoloji problemlərdən biridir. Xroniki xarakter daşıyan bu xəstəlik haqqında cəmiyyətdə tez-tez "müalicəsi yoxdur" kimi yanlış fikirlərə rast gəlinir. Bəs əslində bipolyar pozuntu necə idarə olunur və müalicə mərhələləri nələrdən ibarətdir?

Mövzu ilə bağlı Oxu24.com-a açıqlama verən həkim-psixiatr Aytən Namazova bipolyar affektiv pozuntu və onun müalicə yolları haqqında ətraflı məlumat verib.

Bipolyar pozuntu nədir?

Həkimin sözlərinə görə, bipolyar pozuntu xroniki və dalğavari xarakter daşıyan bir xəstəlikdir. Xəstəlik iki əsas qütbdən ibarətdir:

•Müsbət qütb: Hipomaniya və maniya epizodları ilə müşayiət olunur.

•Mənfi qütb: Depressiv epizodlarla özünü göstərir.

Müalicə necə aparılır?

Aytən Namazova bildirib ki, müalicənin əsas məqsədi farmakoterapiya (dərman müalicəsi) vasitəsilə epizodların təkrarlanmasının qarşısını almaqdır:

•Maniya və Hipomaniya zamanı: Əhval-ruhiyyə stabilləşdiricilərindən (məsələn, litium preparatları, valproat turşusu, lamotricin) və antipsixotiklərdən istifadə olunur.

•Depressiv epizodlar zamanı: Əhval-ruhiyyə stabilləşdiriciləri ilə yanaşı antidepressantlar da təyin oluna bilər. Lakin həkim vurğulayır ki, antidepressantların dozalanmasında çox ehtiyatlı olmaq lazımdır; əks halda xəstə dərhal manikal epizoda keçə bilər.

•Remissiya mərhələsi: Xəstəliyin simptomları sönəndə belə, vəziyyəti sabit saxlamaq və tutmaların təkrar olunmaması üçün əhval-ruhiyyə stabilləşdiriciləri və antipsixotiklər uzunmüddətli (bəzən ömürlük) təyin edilir.

Cəmiyyətdəki ümidsiz yanaşmalara toxunan psixiatr xəstələrin dərman müalicəsi və düzgün diaqnoz sayəsində illərlə davam edən remissiya (sağalma/sakitlik) mərhələsinə keçə bildiklərini vurğulayıb:

"Düzgün diaqnoz və doğru doza ilə aparılan müalicə sayəsində bipolyar pozuntudan əziyyət çəkən şəxslər tam şəkildə normal həyata qayıda bilərlər. Onlar öz peşə fəaliyyətlərini (məllim, həkim və s.) davam etdirə, ailə qurub övlad sahibi ola bilərlər”.

Həmçinin oxuyun

Sürücülərə xəbərdarlıq:Bu küçələr bağlanacaq

Maşınlara etibarnamə verilməsi qüvvədən düşür?

Azərbaycanda 50-yə yaxın təyyarə var, hamısı bizimdir - Şeyxin qardaşı 

Kanat qəzasında günahkar kimdir? – Məsul şəxsləri 7 ilədək həbs gözləyə bilər