Varikoz xəstəliyi niyə bu qədər geniş yayılıb? - AÇIQLAMA

TİBB

118

24.06.2026, 13:57

Varikoz xəstəliyi müasir dövrdə ən çox rast gəlinən damar problemlərindən biri hesab olunur. Mütəxəssislərin sözlərinə görə, damar cərrahlarına və fleboloqlara edilən müraciətlərin əhəmiyyətli hissəsini məhz varikozdan əziyyət çəkən xəstələr təşkil edir. Bunun əsas səbəbi isə xəstəliyin əlamətlərinin gözlə görünməsi və gündəlik həyat keyfiyyətinə ciddi təsir göstərməsidir.

Oxu24.com xəbər verir ki, həkimlər bildirirlər ki, bir çox xəstə ayaqlarında damarların genişlənməsini, şişkinliyi, ağırlıq hissini, ağrını, qaşınmanı və ya dəridə rəng dəyişikliklərini gördükdə həkimə müraciət etməyə qərar verir. İnsan öz sağlamlığında baş verən dəyişiklikləri birbaşa müşahidə etdiyindən, bu xəstəlik digər bir çox damar problemləri ilə müqayisədə daha tez diqqət çəkir.Varikoz sadəcə estetik problem deyil. Müalicə edilmədikdə xəstəlik irəliləyərək ayaqlarda davamlı ağrılara, ödemə, dəri dəyişikliklərinə, trofik yaralara və bəzi hallarda damar daxilində laxtalanma riskinin artmasına səbəb ola bilər.

Həkimlər vurğulayırlar ki, varikozun düzgün diaqnostikası üçün müasir dövrdə ən vacib müayinə üsulu damarların ultrasəs müayinəsi – doppler və ya dupleks skan müayinəsidir. Heç bir peşəkar damar cərrahı və ya fleboloq ultrasəs müayinəsi aparılmadan müalicəyə başlamır. Çünki xəstəliyin hansı mərhələdə olduğunu, hansı damarların zədələndiyini və hansı müalicə üsulunun daha uyğun olduğunu yalnız bu müayinənin nəticələri əsasında müəyyən etmək mümkündür.Varikozun yaranma riskini artıran əsas amillərdən biri həyat tərzidir. Gün ərzində uzun müddət ayaq üstə işləyən insanlar bu xəstəliyə daha çox meyilli olurlar. Satıcılar, müəllimlər, bərbərlər, aşpazlar, tibb işçiləri və digər peşə sahibləri risk qrupuna daxildir. Uzun müddət oturaq vəziyyətdə çalışan ofis əməkdaşlarında da ayaqlarda qan dövranının zəifləməsi səbəbindən varikoz riski artır.Artıq çəki də xəstəliyin yaranmasında mühüm rol oynayır. Bədən çəkisinin artması ayaq damarlarına əlavə yük yaradır və qan dövranını çətinləşdirir. Nəticədə damar divarları zamanla genişlənməyə başlayır və varikoz inkişaf edir.Qadınlarda isə hamiləlik əsas risk faktorlarından biri hesab olunur. Hamiləlik zamanı hormonal dəyişikliklər damar divarlarını zəiflədə, eyni zamanda böyüyən uşaqlığın damarlar üzərində yaratdığı təzyiq qan dövranını çətinləşdirə bilər. Xüsusilə ardıcıl və çoxsaylı hamiləlik keçirmiş qadınlarda varikozun yaranma ehtimalı daha yüksək olur.Bundan əlavə, genetik meyillilik də mühüm amillər sırasındadır. Əgər ailədə valideynlərdən və ya yaxın qohumlardan birində varikoz xəstəliyi olubsa, digər ailə üzvlərində də bu problemin yaranma ehtimalı artır.

Mütəxəssislər bildirirlər ki, son illərdə varikozun müalicəsində böyük irəliləyişlər əldə olunub. Əvvəllər geniş cərrahi əməliyyatlar tələb edən bir çox hallar artıq lazer, radiofrekans ablasiya və digər müasir, minimal invaziv üsullarla uğurla müalicə olunur. Bu prosedurların əksəriyyəti xəstənin qısa müddətdə normal həyata qayıtmasına imkan verir.Həkimlər insanlara ayaqlarda damar genişlənməsi, şişkinlik, ağırlıq hissi və ya ağrı kimi əlamətlər müşahidə etdikdə müayinədən keçməyi tövsiyə edirlər. Erkən diaqnoz və vaxtında başlanan müalicə xəstəliyin ağırlaşmalarının qarşısını almaqda mühüm rol oynayır.

Mütəxəssislərin fikrincə, varikoz xəstəliyindən qorxmaq deyil, onu vaxtında aşkarlamaq və düzgün müalicə etmək lazımdır. Müasir tibbin imkanları sayəsində bu xəstəliyin müalicəsi mümkündür və vaxtında müraciət edən xəstələr əksər hallarda uğurlu nəticələr əldə edə bilirlər.

Jalə

Həmçinin oxuyun