Deputatdan Türkiyə mövzusunda mühüm AÇIQLAMA

Müşfiq Cəfərov: “Əsl qardaşlıq bir-birinin suverenliyinə hörmət etməkdir”

Azərbaycan və Türkiyə arasındakı münasibətlər adi dövlətlərarası əlaqələrdən daha geniş məna daşıyır və ayrı-ayrı qrupların emosional çağırışları, sosial şəbəkələrdə aparılan kampaniyalar bu münasibətlərin ruhuna zərər verməməlidir.

Bu sözləri Milli Məclisin deputatı Müşfiq Cəfərov Oxu24.com saytına açıqlamasında bildirib.

Deputat qeyd edib ki, Azərbaycan müstəqil və dünyəvi dövlətdir. Ölkə daxilində təhsil, ictimai münasibətlər və digər məsələlərlə bağlı qərarların qəbul edilməsi Azərbaycan dövlətinin müstəsna səlahiyyətidir. Hər bir dövlət öz qanunvericiliyinə, Konstitusiyasına və cəmiyyətinin xüsusiyyətlərinə uyğun siyasət müəyyən etmək hüququna malikdir. Bu baxımdan Azərbaycanın qəbul etdiyi qərarı başqa ölkədən təzyiq göstərməklə dəyişdirməyə çalışmaq və məsələni Azərbaycana qarşı kampaniyaya çevirmək qəbuledilməzdir.

Müşfiq Cəfərovun sözlərinə görə, Azərbaycan-Türkiyə münasibətləri sosial şəbəkələrdəki radikal çağırışlardan daha böyük və strateji əhəmiyyətə malikdir. Əsl qardaşlıq bir-birinin dövlət suverenliyinə, qanunlarına və daxili seçimlərinə hörmət etməyi də tələb edir.Azərbaycan öz dünyəvi dövlətçilik modelini və milli maraqlarını qorumaq hüququna malikdir və bu hüquqa hörmət göstərilməsi iki ölkə arasındakı münasibətlərin ruhuna ən uyğun yanaşmadır.

Deputat əlavə edib ki, Türkiyənin sosial media məkanında sıravi istifadəçilərdən tanınmış şəxslərədək müxtəlif dairələrin bu müzakirələrə qoşulması problemin təsir dairəsini genişləndirir.

İctimai nüfuza malik şəxslərin çıxışları daha geniş auditoriyaya çatır və onların söylədikləri fikirlər siyasi gündəmə təsir göstərə bilir. Buna görə də tanınmış şəxslərin məsuliyyəti daha böyükdür. Siyasi mövqeyindən, vəzifəsindən və ya izləyici sayından asılı olmayaraq, hər kəs ictimaiyyətə təqdim etdiyi məlumatın doğruluğuna diqqət yetirməlidir.

Turan Etibaroğlu

Həmçinin oxuyun

Məşhurlardan Prezidentə TƏBRİK: Siyahıda Flora Kərimova,Zeynəb Xanlarova,Aygün Kazımova da var

Azərbaycanda saatlıq maaş tətbiq ediləcək – 1 saatın qiyməti bu qədər ola bilər 

Ərdoğanın Azərbaycan səfərinin detalları bəlli oldu 

Prezidentin "general-leytenant”  rütbəsi verdiyi Zaur Rüstəmov KİMDİR?