Ermənistan seçim qarşısında

Rusiya və Ermənistan arasında son dövrlər müşahidə olunan siyasi fikir ayrılıqları yeni müstəviyə keçib. Erməni ekspert dairələrinin iddiasına görə, Rusiya Prezidenti Vladimir Putin Ermənistanın Baş naziri Nikol Paşinyanla apardığı dialoq zamanı İrəvanın qarşısında konkret seçim tələbi qoyub. İddia olunur ki, Moskva Ermənistanın eyni anda həm Avrasiya İqtisadi Birliyi (AİB), həm də Avropa İttifaqı (Aİ) ilə dərin inteqrasiya siyasəti yürütməsini qəbulolunmaz hesab edir.

Mövzu ilə bağlı Oxu24.com-a açıqlama verən politoloq Züriyə Qarayeva bildirib ki, Moskvanın bu həssaslığı təkcə iqtisadi maraqlarla deyil, birbaşa geosiyasi nəzarət və regiondakı təhlükəsizlik arxitekturası ilə bağlıdır.

Rusiya Ermənistanı itirmək istəmir. Səbəblər nədir?

Politoloqun sözlərinə görə, Rusiya üçün AİB sadəcə iqtisadi platforma deyil, həm də postsovet məkanında siyasi-hərbi təsirin qorunması alətidir:

“Ermənistanın Aİ ilə dərin inteqrasiyaya getməsi regiondakı mövcud balansı Rusiyanın ziyanına dəyişə bilər.

Ticarət rejimləri, texniki standartlar və hüquqi uyğunlaşma sahəsində Aİ standartlarını qəbul etmək AİB çərçivəsindəki öhdəliklərlə birbaşa toqquşur. Ermənistanın Qərbə yönəlməsi uzunmüddətli perspektivdə təhlükəsizlik sahəsində diversifikasiyaya, yəni Rusiyanın hərbi iştirakının sual altına düşməsinə səbəb ola bilər”.

Züriyə Qarayeva vurğulayıb ki, Paşinyan hökuməti Qərbə doğru addım atmağa davam edərsə, Moskvanın əlində kifayət qədər təsir rıçaqları var:

"Rusiyanın təzyiq mexanizmləri çoxşaxəlidir. Buraya Ermənistanın Rusiya bazarına çıxışının məhdudlaşdırılması, miqrant köçürmələrinə maneələr və investisiya axınının dayandırılması daxildir. Ən ciddi təzyiq isə enerji sahəsində - qaz təchizatı və qiymət siyasəti vasitəsilə ola bilər”.

Putin tərəfindən verildiyi iddia edilən xəbərdarlıq — "əks halda vəziyyət başqa cür olacaq" — həm də hərbi-siyasi müstəvidə ciddi təhdidlərdən xəbər verir. Politoloq qeyd edir ki, bura daxili siyasi proseslərə dolayı müdaxilə, informasiya müharibəsi və hərbi əməkdaşlığın zəiflədilməsi də daxildir.

Görünən odur ki, İrəvan üçün "iki stulda oturmaq" dövrü bitir. Moskva Ermənistanın Qərblə yaxınlaşmasını sadəcə bir seçim deyil, regional nizama qarşı bir təhdid kimi qiymətləndirir. Paşinyanın bu ultimataum qarşısında hansı addımı atacağı isə bölgənin gələcək taleyini müəyyən edəcək.

Çimnaz Telmanqızı

Həmçinin oxuyun

Sürücülərin bilməli olduğu VACİB MƏQAM: Bu halda cərimə OLUNACAQSINIZ

Pensiya təyinatında qaydalar DƏYİŞDİ: Bu şəxslərin müavinəti belə hesablanacaq — YENİ AÇIQLAMA

Bu gündən başlayaraq 5 gün davam edəcək  — ƏHALİYƏ XƏBƏRDARLIQ

Bol yağışın dəhşətli səbəbi üzə çıxdı - İran görün nə edib...