Ukrayna Prezidenti Volodimir Zelenskinin komandası Donald Trampla Mar-a-Laqo iqamətgahında görüşməkdən imtina edib.

OXU24.COM xəbər verir ki, bu barədə "Time" jurnalı məlumat yayıb.

Nəşrin məlumatına görə, Tramp və Zelenski komandaları arasında görüşlə bağlı müzakirələrə Mar-a-Laqoda danışıqların aparılması variantı da daxil edilib. Lakin Ukrayna tərəfi bu təklifi rədd edərək belə bir görüşün Trampın prezidentlik kampaniyasına dəstəyi ilə bağlı şübhələr yarada biləcəyini izah edib.

Əvəzində Zelenskinin komandası neytral ərazidə görüş təşkil etməyi, məsələn, Amerika kanalında birgə müsahibəni təklif edib. Lakin Zelenskinin Pensilvaniyadakı sursat istehsalı zavoduna səfərindən sonra vəziyyət dəyişib və görüşlə bağlı planlar baş tutmayıb. Ukraynalı məmurlardan biri qeyd edib ki, Tramp yəqin ki, “inciyib”.

Zelenski sentyabrın 26-da Amerikanın Skranton şəhərindəki hərbi zavoda baş çəkib. Jurnalist və siyasi şərhçi Ben Şapiro bildirib ki, bu səfər Vaşinqtonun köməyinə ümid edən siyasətçi üçün ən pis qərarlardan biridir.

Bundan əvvəl ABŞ Konqresinin Zelenskinin Pensilvaniyaya səfəri ilə bağlı araşdırmaya başladığı bildirilib.