30 ildir öz evinə girə bilmir - Sumqayıtda məhkəmə qərarının icrasını kim yubadır?

Respublikanın müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət köç karvanları azad edilmiş rayonlara yola düşür. Məcburi köçkünlərin məckunlaşdıqları şəxsi evlərdən hələ də köçməmələri isə ev sahiblərini narahat edir.

Sumqayıt şəhər, sakini Səlimova Reyhan İsgəndər qızı Xeberle.com-a müraciət edərək, Sumqayıt şəhər, 9-cu mikrorayon, bina 29, mənzil 33də yerləşən özünə məxsus mənzilin məcburi köçkün tərəfindən 30 ildir zəbt edildiyini bildirib. Şikayətçi, bununla bağlı dəfələrlə məhkəmə olduğunu deyir:

"2001-ci ildə məhkəmə bizə bir otaq verdi ki, məchburi köçkünlə bir yerdə qalaq. Lakin, buna nə məcburi köçkün razı oldu, nə də icraçılar məhkəmə qərarını təmin etdi. Bu yaxınlarda yeni məhkəmə oldu. Məhkəmə evin tam boşaldılması ilə bağlı qərar qəbul etdi. Lakin, 3 aya yaxındır ki, məhkmə qərarı Sumqayıt icra şöbəsi tərəfindən icra edilmir. Hər dəfə müxtəlif bəhanələr gətirilir”.

Reyhan Səlimova məhkəmə tərəfindən qəbul edilmiş qərarın icra edilməsini tələb edir: "Məcburi köçkün bizə deyir ki, məni narahat etməyin. Yəni bizi haqsız çıxarmağa çalışırlar. Dövlət onlara yardım edir, bizə isə yox...Biz də bu ölkənin vətəndaşlarıyıq. Qaçqınkoma yönəldirlər. Bu qurumda deyir ki, onlara nə vaxtsa öz torpaqlarında ev tikiləcək, o zaman ev boşaldılacaq. 30 il gözləmişik. Bundan sonra hələ 15 il də gözləməliyik ki, bunların kefi nə vaxt istəsdə torpaqlarına gedəcəklər. Məcburi köçkün deyir ki, mənə Stansiya Sumqayıtdan ev versinlər gedim. Bu məsələnin həll yolu var. Lakin, qurumlar buna biganə yanaşır. Ölkəmiz də qanun var. Mənzil toxunalmazlığı hüququ var. Xahiş edirəm ki, məhkəmə tərəfindən qəbul edilmiş qərar icra edilsin”.

Qeyd edək ki, mülki qanunvericiliyin tələbinə əsasən, mənzilin mülkiyyətçisi mənzildə yaşayan şəxslərin məcburi qaydada çıxarılması və mənzilin boşaldılaraq ona təhvil verilməsi barədə məhkəmədə iddia qaldırmaq hüququna malikdir. Konstitusiyanın 29-cu maddəsinə əsasən, heç kəs məhkəmənin qərarı olmadan mülkiyyətindən məhrum edilə bilməz. 60-cı maddəyə əsasən isə, hər kəsin hüquq və azadlıqlarının inzibati qaydada və məhkəmədə müdafiəsinə təminat verilir.