Həddindən artıq qəhvə içmək nələrə səbəb olur? 

Gün ərzində normadan artıq qəhvə istehlakı baş ağrısı, yuxu pozğunluğu, ürəkdöyünmə və narahatlıq kimi bir sıra problemlərə səbəb ola bilər.

Xüsusilə xroniki yorğunluq və enerji çatışmazlığı yaşayan insanlar gün ərzində daha çox qəhvə qəbul etməyə meyllidirlər. Qəhvə isə bu məqsədlə ən çox istifadə edilən içkilərdən biridir. Mütəxəssislər həddindən artıq qəhvə istehlakının həm qısamüddətli, həm də uzunmüddətli dövrdə müəyyən mənfi təsirlər yarada biləcəyini bildiriblər.

Az miqdarda kofein bəzi insanlarda baş ağrısını azaltmağa kömək edə bilər. Kofein qan damarlarını daraltdığı üçün miqren tutmasının başlanğıcında bir fincan qəhvə bəzi insanlarda ağrını yüngülləşdirə bilər. Bu səbəbdən bəzi ağrıkəsici preparatların tərkibində də kofeindən istifadə olunur.

Lakin qəhvənin həddindən artıq qəbulu bir sıra əks təsirlərə səbəb ola bilər.

Sinir sisteminə təsiri: Həddindən artıq kofein ürəkdöyünməni sürətləndirə, narahatlıq və əsəbilik yarada bilər. Kofein yuxuya da mənfi təsir göstərir. Yatmazdan bir neçə saat əvvəl qəbul edilən qəhvə belə bəzi insanlarda yuxunun keyfiyyətini poza bilər.

Baş ağrıları: Müntəzəm olaraq çox miqdarda kofein qəbul edən şəxslərdə qəhvənin miqdarının qəfil azaldılması və ya dayandırılması çəkilmə baş ağrılarına səbəb ola bilər. Bu zaman yorğunluq və əsəbilik də müşahidə edilə bilər.

Həzm sistemi: Qəhvə mədə turşusunun ifrazını artıra bilər. Bu səbəbdən reflüks və mədə problemləri olan insanlarda simptomların güclənməsi mümkündür. Bəzi insanlarda qəhvə ürəkbulanma və mədə narahatlığına da səbəb ola bilər.

Qan təzyiqi: Kofein bəzi insanlarda qan təzyiqinin müvəqqəti yüksəlməsinə səbəb ola bilər. Buna görə yüksək qan təzyiqi olan şəxslərin həddindən artıq kofein qəbulundan çəkinməsi tövsiyə olunur.

Dəmirin mənimsənilməsi: Qəhvənin yeməklə birlikdə və ya yeməkdən dərhal sonra qəbul edilməsi dəmirin orqanizm tərəfindən mənimsənilməsini azalda bilər. Bu səbəbdən dəmir çatışmazlığı riski olan şəxslərin qəhvə qəbulunun vaxtına diqqət etməsi vacibdir.

Sümük sağlamlığı: Həddindən artıq qəhvə istehlakının kalsium mübadiləsinə təsir göstərə biləcəyi və uzunmüddətli dövrdə sümük sağlamlığı baxımından mənfi nəticələr yarada biləcəyi bildirilir.

Mütəxəssislər qəhvə istehlakında fərdi xüsusiyyətlərin nəzərə alınmasının vacib olduğunu vurğulayırlar. Kofeinə həssaslıq insandan insana dəyişdiyi üçün yuxu, ürəkdöyünmə və narahatlıq kimi əlamətlər müşahidə edən şəxslərin qəbul etdiyi kofein miqdarını azaltması məqsədəuyğundur.

Həmçinin oxuyun

Azərbaycanda YENİ QAYDA - Bu şəxslərə 300 MANAT VERİLƏCƏK

Sentyabrın 15-i bu şəxslərə icazə verilə bilər - 3 SAATLIQ 

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO