Qulaqcıqdan gələn təhlükə – uzunmüddətli istifadə beyinə necə təsir edir?

MARAQLI

697

09.04.2026, 18:20

Xəbərlərimizi Google-da izləyin

Yeniliklərdən dərhal xəbərdar olun

Saatlarla qulaqcıqdan istifadə etmək artıq bir çox insan üçün adi vərdişə çevrilib. Lakin mütəxəssislər xəbərdarlıq edir ki, bu vərdiş təkcə qulaq sağlamlığına deyil, həm də beyin və sinir sisteminə ciddi təsirlər göstərə bilər.

Nevroloq Jalə Qarayevanın Oxu24.com-a verdiyi məlumata görə, uzun müddətli və fasiləsiz səsə məruz qalmaq bir sıra nevroloji problemlərə yol açır.

Mütəxəssis bildirir ki, ilk növbədə “sensor yüklənmə” baş verir. Yəni, beyin davamlı səs axınına məruz qaldıqda eşitmə mərkəzləri həddindən artıq yüklənir. Bu isə yorğunluq, baş ağrısı, əsəbilik və diqqət dağınıqlığı ilə nəticələnir.

Digər mühüm məqam dopamin təsiri ilə bağlıdır. Musiqi dinləmək qısa müddətdə beyində dopamin ifrazını artıraraq xoş hiss yaradır. Lakin uzun müddət qulaqcıq istifadə edən insanlarda beyin bu stimula alışır. Nəticədə səssiz mühit darıxdırıcı görünür və müəyyən asılılıq formalaşa bilər.

Bundan əlavə, beyin damarlarında spazm yaranması ehtimalı da var ki, bu da tez-tez baş ağrıları ilə özünü göstərə bilər.

Qulaqcıqların birbaşa eşitmə sisteminə təsiri isə daha ciddi nəticələr doğura bilər. Eşitmə sinirinin zədələnməsi geri dönməz eşitmə itkisinə səbəb ola bilər. Həmçinin tinnitus – yəni qulaqda cingilti, səs və ya uğultu hissi yarana bilər ki, bu da xüsusilə gecə saatlarında daha çox narahatlıq yaradır.

Mütəxəssis əlavə edir ki, bəzi hallarda vestibulyar sistem də təsirlənir. Bu zaman baş gicəllənməsi və balans pozğunluğu kimi əlamətlər müşahidə oluna bilər.

Nevroloqlar tövsiyə edir ki, qulaqcıq istifadə zamanı səs səviyyəsi normada saxlanmalı, uzun müddətli fasiləsiz istifadədən qaçınılmalı və mütəmadi fasilələr verilməlidir.

Nigar

Həmçinin oxuyun