Bakının girişindəki postda polisə rüşvət təklif edən şəxs saxlanılıb - SON DƏQİQƏ

Bakının girişində qurulmuş postlarda polisə rüşvət təklif edən şəxs saxlanılıb.

Hüquq-mühafizə orqanlarından   verilən məlumata görə, Koronavirus infeksiyasının yayılmasının qarşısını almaq məqsədilə Bakı-Ələt yolunda qoyulmuş postda rayon qeydiyyatında olan bir vətəndaş paytaxta israrla paytaxta daxil olmaq istəyi nümayiş etdirib. O, məqsədinə çatmaq üçün polisə rüşvət təklif edib. Həmin şəxs saxlanılaraq barəsində tədbir görülüb.

Daxili İşlər Nazirliyinin mətbuat xidmətinin rəisi, polis polkovniki Ehsan Zahidov APA-nın sorğusuna cavabında faktı təsdiqləyib. Bildirib ki, koronavirus infeksiyasının yayılmasının qarşısını almaq məqsədilə bütün səviyyələrdə hərəkətin məhdudlaşdırılması və sosial təcridin gücləndirilməsi tədbirləri davam etdirilir:

“Bu məqsədlə martın 19-dan etibarən xüsusi təyinatlı, o cümlədən təcili tibbi yardım, qəza-bərpa, xilasedici, habelə yük daşıyan avtomobillərin hərəkəti istisna olmaqla respublikanın şəhər və rayonlarında qeydiyyatda olan nəqliyyat vasitələrinin və onların sərnişinlərinin Bakı, Sumqayıt şəhərlərinə və Abşeron rayonuna buraxılması martın 29-dək dayandırılıb.

Bütün bu qabaqlayıcı tədbirlər vətəndaşlarımız tərəfindən alqışlanır və anlayışla qarşılanır. Çünki hamı yaxşı bilir ki, bu tədbirlər onların təhlükəsizliyinin, sağlamlıqlarının qorunması üçün tətbiq edilir. Buna baxmayaraq bəzən sosial şəbəkələrdə qərəzli və uydurma məlumatlara da rast gəlinir. İddia edilir ki, guya Bakıya gəlmək istəyən rayon qeydiyyatında olan şəxslərdən polis postlarında pul alıb  buraxırlar.

Tamamilə uydurma və dezinformasiyadır. Məsələn, dünən polis əməkdaşları pul müqabilində paytaxta keçməyə cəhd edən şəxsi ifşa ediblər. Belə ki, Bakı-Ələt yolundakı posta gələn İmişli rayon sakini Museyib Gülalıyev Bakıya buraxılması üçün polis əməkdaşına pul təklif edərkən saxlanılıb. Onun barəsində İnzibati Xətalar Məcəlləsinin 211-ci maddəsi ilə akt tərtib olunaraq məhkəməyə göndərilib. Bu faktın özü bir daha sübut edir ki, postlarda polisin rayon qeydiyyatında olan vətəndaşlardan pul alması uydurmadır və qərəzdən irəli gəlir”.