Tural Sultanov dənizə niyə düşüb? - Həkimin gəmidə yoxa çıxmasının YENİ TƏFƏRRÜATI  

Gəmidə həkim kimi fəaliyyət göstərən Tural Sultanovun itkin düşməsi ilə bağlı yeni təfərrüatlar məlum olub.

Oxu.Az xəbər verir ki, bu barədə onun əmisi qızı, jurnalist Ağanisə Sultan məlumat verib.

O bildirib ki, Tural Sultanovdan artıq 31 gündür xəbər yoxdur:

"Ailəmiz, Turalın atası, anası çox ağır günlər yaşayır. Həmin gün gəmidə nə baş verib, Tural niyə dənizə düşüb? Peşəkar üzgüçü olduğu halda niyə xilas olmayıb və ya edilməyib? Hadisə baş verdiyi an kamera görüntülərində nələr yer alıb? Tural dənizdə işləməyi özü seçmişdi. Həkim atasının ən böyük istəyi Turalın Almaniyada təhsilini, işini davam etdirməsi, məşhur həkim olması idi. Təbii ki, oğlunun seçiminə də hörmətlə yanaşırdı.

Dəniz Turalın ikinci evi idi, yenicə aldığı evin də mənzərəsi dənizə açılırdı".

Tural Sultanov dənizə niyə düşüb? - Həkimin gəmidə yoxa çıxmasının YENİ TƏFƏRRÜATI

Ağanisə Sultan qeyd edib ki, Tural itkin düşməzdən bir gün əvvəl anası Aygün xanımla danışıb. O, Aygün xanımın aşağıdakı sitatlarını qeyd edib:

"Balam dənizin ortasında olduğundan bəzən danışanda əlaqə kəsilirdi, artıq buna öyrəşmişdik. Həmişəki kimi danışdı, yaxşı olduğunu dedi. Tural dənizə gedəndə yay idi. Havalar soyuduğundan isti geyimlərini ayırmışdım. Fikirləşdim ki, səhər zəng edəndə balama deyim ki, sən oralarda üşüyəcəksən, gəmiyə gələn olacaqsa, geyimlərini göndərim. 63 gün idi orada idi. Əslində bir ay dənizdə, bir ay evdə olurdu. Başqa həkim yoldaşının yerinə də işə çıxmışdı. Oktyabrın 12-15 arası qayıdacaqdı. Ən çox mənim bişirdiyim şorqoğalını və peraşki istəyirdi. Turalım gələndə sevdiyi yeməkləri bişirib, süfrəyə düzəcəkdim. Məni bu qədər intizarda qoymazdı balam".

Həmçinin oxuyun

Gecə telefona baxanlara nevroloqdan XƏBƏRDARLIQ: Bu xəstəlik yaradırmış...

İş günlərinin yeri dəyişdirildi 

DİN əməliyyat keçirib: Həbs olunan var -VİDEO

Müdafiə Nazirliyində yüksək vəzifəli hərbçi həbs olundu

Onun sözlərinə görə, sentyabr ayının 27-si atası işdən evə gələndə Turalın həkim kimi çalışdığı Leyla Şıxlinskaya klinikasından zəng edib, belə hadisənin baş verdiyini bildiriblər:

"Bir neçə gün minlərlə, on minlərlə insana şəfa verən əmimə nəsə deməyə, təsəlli verməyə cürət etmədim".

Ağanisə Sultan qeyd edib ki, Tural həkimin işlədiyi gəmi sahilə gələndən sonra ailəyə kamera görüntüləri göstərilib. O, Aygün xanımın bu haqda nitqini də diqqətə çatdırıb. Sitat:

"Arxadan, çox uzaqdan görüntülər var. Biz öndən çəkilən görüntüləri istəyəndə, əllərində ancaq bunun olduğunun dedilər. Arxadan gedir, göyərtəyə çıxır, dənizə düşür, üzdüyü yer də görünür, 3 dəqiqə sonra xilasedici qayıqlar suya buraxılır. Bizə deyirlər ki, siz öz övladınızı arxadan, geyimindən tanımırsınız? Mənim oğlum nədən özünü dənizə atsın, səbəb nə olub? Niyə öndən, yaxından çəkilmiş kamera görüntüləri yoxdur? Balam 17 yaşından xarici ölkələrdə gecəsini gündüzünə qatıb oxuyurdu, özünü inkişaf etdirirdi, dillər öyrənirdi. Ən son 5-ci dili ispan dilini öyrənirdi. İdmanla məşğul idi, peşəkar üzgüçü idi, dalğada, ən pis hava şəraitində belə dənizdə üzməyi bacarırdı. Paraşütdən tullanırdı, evə alıb qoyduğu yeni idman alətləri olduğu kimi durur, özü gəlib açacaqdı. Evi olsa da, başqa dəniz mənzərəli yeni ev almışdı. Mənə dedi ki, öz zövqünə görə mətbəx mebeli sifariş ver, dənizdən qayıdandan sonra birlikdə gedib, ev əşyaları seçərik. Turalımın arzuları vardı, bizim arzumuz isə Tural idi. Mən balamın nişanını, toyuna görmək arzusunda idim, indi səsinə, nəfəsinə, özünə həsrət qalmışam. Hava soyuqdur, balam dənizdə üşüyür..."

A.Sultan bildirib ki, ailədə olan məlumata görə, Tural hadisədən bir gün əvvəl işlədiyi Leyla Şıxlinskaya klinikası ilə telefonda danışıb:

"Həmin gün orada nə baş verib, Tural niyə klinikaya zəng edib, nə danışıb, sonra nə olub? Heç nə bilmirik. Əgər intihar etmək fikrində olubsa (birmənalı şəkildə bunu rədd edirik), nədən dənizdə geyindiyi ayaqqabıları çıxarıb, telefonu da yanına qoyub? Suallar çoxdur. Bizim Turalımız 31 gündür yoxdur".