Piyada keçidlərində təhlükə: Sürücülərə qarşı cəzalar sərtləşdirilməlidir? – AÇIQLAMA  

Yollarda piyada keçidlərindən istifadə edən vətəndaşların təhlükəsizliyi məsələsi cəmiyyətdə ən çox müzakirə olunan mövzulardan biridir. Mütəmadi olaraq piyadalara yol verməyən, keçidlərdə üstünlük hüququnu pozan sürücülər barədə şikayətlər eşidilməkdədir. Bu hal artıq fərdi qayda pozuntusundan daha çox, cəmiyyətdə ciddi yol mədəniyyəti və məsuliyyətsizlik problemi kimi qiymətləndirilir. Sürücülərin bu diqqətsizliyi təkcə insan həyatı üçün təhlükə yaratmır, həm də vətəndaşları piyada hərəkət etməkdən çəkindirir. Mövcud vəziyyətin aradan qaldırılması üçün həm inzibati cəza mexanizmlərinin, həm də infrastruktura dair yeniliklərin tətbiqi vacib sayılır.

Mövzu ilə bağlı Oxu24.com-a açıqlama verən nəqliyyat eksperti Rauf Ağamirzəyev bildirib ki, yol hərəkətində ən müdafiəsiz iştirakçı məhz piyadalardır.

Ekspertin sözlərinə görə, şəhər infrastrukturu ilk növbədə piyadanın rahat və təhlükəsiz hərəkətini təmin edəcək formada qurulmalıdır.

Ekspert qeyd edib ki, yollarda sürəti azaldan mühəndislik həllərinin tətbiqinə böyük ehtiyac var:

“Bununla yanaşı, piyadalara yol verməyən sürücülər kameralar vasitəsilə dəqiq müəyyən edilməli və onlara inzibati qaydada müvafiq cəzalar verilməlidir”.

R.Ağamirzəyev vurğulayıb ki, yol hərəkətində piyadanın sərbəstliyi məhdudlaşırsa, bu, birinci növbədə ciddi təhlükəsizlik təhdidi yaradır, ikinci növbədə isə insanları piyada gəzməkdən çəkindirir:

“Bütün müasir dünyada şəhərlər insan yönümlü planlaşdırılır. Piyadanın rahat hərəkəti üçün səkilər abad və rəvan olmalı, qısa piyada marşrutları formalaşdırılmalıdır.

İstər nizamlanmayan, istərsə də düyməli və ya adi svetoforlu "zebra" keçidləri düzgün təşkil edilməlidir. Keçidlərin uzunluğu iki zolaqdan artıqdırsa, burada təhlükəsizlik adacıqları qurulmalı, kontrast işıqlandırma və zolaqların eninin kiçildilməsi kimi həllər icra olunmalıdır”.

Rauf Ağamirzəyev sonda əlavə edib ki, bu infrastruktura aid addımların ana məqsədi hər hansı bir ehtiyatsızlıq və ya qəza baş verəcəyi təqdirdə belə, hadisənin ölüm göstəricisi ilə deyil, yüngül xəsarətlə nəticələnməsini təmin etməkdir.

Çimnaz Telmanqızı

Həmçinin oxuyun

SON DƏQİQƏ! Bakıda və ətraf ərazilərdə satış dayandırıldı - Səbəb nədir?

15 sentyabrda bizi nələr gözləyir? — Ulduz falı

Məzuniyyətdə olarkən xəsətlənən işçi işdən çıxarıla bilərmi? - Vacib məqam

Sahil Babayevdən yeni əmr