Niderlandın baş naziri vəzifəsini icra edən Mark Rutte Tel-Əvivə səfəri zamanı israilli həmkarı Benyamin Netanyahu ilə  söhbət edib.

Oxu24.com xəbər verir  ki, detallar barədə  NL Times məlumat yayıb.

Portalın məlumatına görə, danışıqlar çərçivəsində hollandiyalı siyasətçi yəhudi dövlətinin Qəzza zolağında mümkün quru əməliyyatına hazırlaşdığı bir vaxtda İsrailin baş nazirinə məsləhətlər verib.

“Rutte İsrailə səfərindən İsrailin Qəzza zolağında HƏMAS-a qarşı növbəti addımlarını istiqamətləndirərkən Netanyahunu “müdrikliyə” arxalanmağa çağırmaq üçün istifadə edib”, - hesabatda deyilir.

NL Times-ın qeyd etdiyi kimi, Hollandiyanın baş naziri Netanyahuya İsrail dövlətinin malik olduğu imkanlara işarə edib və ona İsrailin HƏMAS-a qarşı mübarizəsindən mülki əhalinin əziyyətini minimuma endirməyə çalışmağı tövsiyə edib.

“Rutte bildirib ki, onun fikrincə, HƏMAS-ın məhv edilməsi vacibdir, çünki HƏMAS təhlükəsi qaldığı müddətcə İsrailin gələcəyi təhlükə altındadır”, - mətndə vurğulanır.

Oktyabrın 7-də Həmas İsrailə bir neçə min raket atdı və Əl-Əqsa Daşqını əməliyyatının başladığını elan etdi. Minlərlə yaraqlı İsrail ərazisini işğal edərək onlarla hərbi texnikanı və yüzdən çox girovu ələ keçirib. Bunun fonunda İsrailin baş naziri Binyamin Netanyahu ölkənin müharibə vəziyyətində olduğunu açıqlayıb.

İsrail Müdafiə Qüvvələrinin cavab əməliyyatı “Dəmir Qılınclar” adlanırdı və məqsədlərindən biri də HƏMAS-ın məhv edilməsi idi. İsrail Hərbi Hava Qüvvələri Qəzza zolağında yaraqlıların yüzlərlə hədəfinə zərbələr endirib və ölkənin Milli Təhlükəsizlik Şurası anklava su, ərzaq, mal, elektrik və yanacaq tədarükünü dayandırmaq qərarına gəlib. Oktyabrın 13-də İsrail BMT-yə quru əməliyyatı başlamazdan əvvəl 1,1 milyon fələstinlinin Qəzzanın cənubuna təxliyyə ediləcəyini açıqlayıb.

Müəllif:Nigar