Moldova prezidenti “AB haqqında dəhşətli hekayələr” haqqında danışıb

Moldova prezidenti Maia Sandu Kişinyovun Avropaya inteqrasiya perspektivlərini müsbət qiymətləndirib, lakin vətəndaşları “AB haqqında dəhşətli hekayələrlə” qorxutmağa yönəlmiş “əhəmiyyətli səylərə” işarə edib.

Oxu24.com xəbər verir ki,onun sözlərini NewsMaker portalı yayıb.

“Düşünürəm ki, yaxşı gedirik. Avropa Komissiyası hazırda qiymətləndirmə aparır və oktyabrın sonuna kimi hesabatını təqdim edəcək. İyun ayında biz digər iki namizəd ölkəni, Ukrayna və Gürcüstanı qabaqladıq və bu məsələdə daha da irəlilədik”, - Sandu bildirib.

O, həmçinin qeyd edib ki, Moldova vətəndaşlarının yarıdan çoxu Aİ-yə qoşulmaq ideyasını dəstəkləyir. Eyni zamanda, dövlət başçısı Avropa İttifaqına üzv olmaq perspektivi ilə bağlı “vətəndaşları bölmək, qorxutmaq və yanlış məlumatlandırmaq” cəhdlərinə diqqət çəkib.

Bundan əvvəl Maia Sandu bildirib ki, ölkədə Avropa dəyərlərinin təbliği üçün Rusiya ilə əməkdaşlıqdan imtina edilməlidir.

“İnsanların təkcə Avropa dəyərlərini dəstəklədiklərini söyləmələri lazım deyil. Bizim üçün vacibdir ki, siyasətçilər bu Avropa dəyərlərinə uyğun işlədiklərini və yaşadıqlarını göstərsinlər”, - deyə dövlət başçısı vurğulayıb.

Onun sözlərinə görə, “Avropanın, Moskvanın və hər kəsin yanında olduğumuzu demək kifayət deyil”. Sandu qeyd etdiyi kimi, ya demokratiyaya can atırsınız və onu hər gün göstərirsiniz, ya da sadəcə söhbətdir.

 

Müəllif:Afət