Avropa İttifaqı Ukraynaya 5 milyardlıq yardımla bağlı razılığa gələ bilmir

Avropa İttifaqının xarici işlər nazirləri 2024-cü il üçün Ukraynaya 5 milyard avro məbləğində hərbi yardımın ayrılması ilə bağlı razılığa gələ bilməyiblər.

Oxu24.com xəbər verir  ki,bu barədə oktyabrın 2-də Kiyevdə xarici işlər nazirlərinin qeyri-rəsmi görüşündə Aİ-nin xarici işlər və təhlükəsizlik siyasəti üzrə ali nümayəndəsi Xosep Borrell bildirib. Onun sözlərini UNIAN sitat gətirir.

Borrell bu ilin sonuna qədər razılığın əldə olunacağına ümid etdiyini bildirib: “Mən gələn il üçün Avropa Sülh Fondu çərçivəsində 5 milyard avro məbləğində yeni hərbi yardım paketi təklif etmişəm. Ümid edirəm ki, ilin sonuna qədər, Aİ ölkələri çoxillik büdcə ilə bağlı razılığa gəlməli olacaqlar”.

İclasda həmçinin ilin sonuna qədər F-16 pilotları da daxil olmaqla, təxminən 40 min Ukrayna hərbçisinin hazırlanması planları açıqlanıb. Borrell müdafiə sənayesi və kiberməkanda əməkdaşlığın gücləndirilməsinin, eləcə də dezinformasiya kimi hibrid təhlükələrlə mübarizənin vacibliyini vurğulayıb.

Kiyevdə keçirilən görüşdə Borrell Rusiyaya təzyiqlərin artırılmasının zəruriliyindən danışıb və vurğulayıb ki, Ukrayna Avropa İttifaqına daxil olmamışdan əvvəl “çətin mübarizə” ilə üz-üzədir.

 

Müəllif:Nigar