Simonyan Bakıya gələcəksə… – Deputatdan sülh prosesi ilə bağlı MÜHÜM AÇIQLAMA  

Ermənistan rəsmisi Alen Simonyanın Bişkekdə Azərbaycan Prezidentinin köməkçisi Hikmət Hacıyevlə görüşündən sonra Bakıya ehtimal edilən səfərini istisna etməməsi diqqətləri yenidən sülh danışıqlarına yönəldib. Səfərin konkret tarixi bəlli olmasa da, belə bir addımın atılması Bakı və İrəvan arasında birbaşa dialoqun keyfiyyətcə yeni mərhələyə keçməsinə zəmin yaradır. Cənubi Qafqazda davamlı sabitliyin bərqərar olunması fonunda qarşılıqlı təmasların intensivləşməsi açıq qalan məsələlərin birbaşa müzakirəsinə geniş imkanlar açır. İki ölkə arasında vasitəçisiz dialoq mexanizmlərinin işə düşməsi regional etimad mühitinin formalaşmasında müstəsna rol oynayır. Ekspertlər və siyasi analitiklər bu ehtimal olunan səfəri Azərbaycan-Ermənistan münasibətlərinin normallaşması istiqamətində mühüm dönüş nöqtəsi kimi qiymətləndirirlər. Yaranmış yeni reallıqlar çərçivəsində tərəflərin birbaşa təmasları sülh müqaviləsinin bağlanması prosesini daha da sürətləndirə bilər.

Mövzu ilə bağlı Oxu24.com-a açıqlama verən Milli Məclisin deputatı Ceyhun Məmmədov bildirib ki, ehtimal olunan bu səfər sülh prosesi üçün son dərəcə böyük əhəmiyyət kəsb edir:

"Hesab edirəm ki, bu, çox vacib və əhəmiyyətli bir səfərdir. Biz nəzərə almalıyıq ki, artıq münaqişə arxada qalıb. Əvvəllər hər səhərimizi atəşkəsin pozulması və şəhid xəbərləri ilə açırdıqsa, indi Azərbaycan-Ermənistan sərhədində sabitlikdir, müharibə yoxdur”.

Deputatın sözlərinə görə, artıq münasibətləri daha da normallaşdırmağın vaxtı gəlib çatıb və qarşıdakı dövrdə bu cür qarşılıqlı səfərlərin olması tamamilə təbiidir.

Ceyhun Məmmədov qeyd edib ki, bu gün Azərbaycan-Ermənistan münasibətlərinin normallaşması bizim dövlət maraqlarımıza xidmət edir, biz ənqısa vaxtda sülhə nail olmalıyıq:

“Bu səfərdə dialoqun davam etdirilməsi, əməkdaşlığın gücləndirilməsi və həllini tapmamış məsələlərin müzakirəsi xüsusi önəm və əhəmiyyət daşıyır. Biz məsələyə məhz bu kontekstdən, bu anlamdan yanaşmalı və bu formada mövqe nümayiş etdirməliyik. Səfər astanasında bir çox məsələlər müzakirə olunacaq, dialoq davam etdiriləcək və sülhə gedən yolda hər iki tərəf birgə sıx əməkdaşlıq edəcək".

Çimnaz Telmanqızı

Həmçinin oxuyun

Zaur Kamaldan xəbər var -Özündən AÇIQLAMA   

Bankda pulu olanlara XƏBƏRDARLIQ!

Bizi su böhranı gözləyə bilərmi? — Azərbaycanın su ehtiyatı ilə bağlı AÇIQLAMA 

Bank kartlarının satışına qadağa qoyulub?  — Rəsmi AÇIQLAMA