ABŞ-ın 60 ölkəyə tətbiq etdiyi yeni tariflər məhkəməyə verilib

DÜNYA

25.07.2026, 12:02

ABŞ Prezidenti Donald Tramp administrasiyasının 1974-cü il Ticarət Qanununun 301-ci maddəsi əsasında 60 ticarət tərəfdaşına tətbiq etdiyi tariflər məhkəməyə verilib.

Oxu24.com xəbər verir ki, ABŞ Beynəlxalq Ticarət Məhkəməsinə iki şirkət tərəfindən təqdim olunan kollektiv iddiada, ABŞ idxalının təxminən 99,4 faizini əhatə edən ölkələrə tətbiq edilən 10 və 12,5 faizlik tariflərin ləğvi tələb olunur. İddiaçılar bu tariflərin qanunsuz olduğunu bildirirlər.

Məhkəməyə təqdim edilən sənəddə qeyd olunur ki, Tramp administrasiyasının 301-ci maddəyə əsasən atdığı son addım Konqresin icra hakimiyyətinə verdiyi səlahiyyətlərin hüdudlarını aşır. Bundan əlavə, tariflərin tətbiq olunma mexanizminin "özbaşına və əsassız" olduğu iddia edilir.

ABŞ Ticarət Nümayəndəliyi (USTR) daha əvvəl 1974-cü il Ticarət Qanununun 301-ci maddəsi çərçivəsində aparılan araşdırmaların nəticələrinə əsasən 60 ticarət tərəfdaşına 10 və ya 12,5 faiz tarif tətbiq ediləcəyini açıqlamışdı. Qurum bu qərarı həmin ölkələrin məcburi əmək yolu ilə istehsal olunan malların idxalına qoyulan qadağanı lazımi səviyyədə icra etməməsi ilə əsaslandırmışdı.

Tramp administrasiyasının bu addımı, ABŞ Ali Məhkəməsinin Beynəlxalq Fövqəladə İqtisadi Səlahiyyətlər Qanunu (IEEPA) çərçivəsində tətbiq olunan tarifləri qanunsuz hesab etməsindən sonra atılıb. Qərar, həmçinin 122-ci maddə əsasında 150 gün müddətinə tətbiq edilən 10 faizlik müvəqqəti qlobal tariflərin başa çatmasına az qalmış qüvvəyə minib.

Həmçinin oxuyun