Gürcüstan Lavrovun təklifini rədd edir

Gürcüstan Cənubi Qafqaz üzrə “üç üstəgəl üç” danışıqlar formatını Rusiyanın orada iştirakına görə qəbuledilməz hesab edir.

Oxu24.com  xəbər verir ki, bunu jurnalistlərə hakim “Gürcü arzusu” partiyasından olan deputat Levan Maçavariani deyib.

Bir gün əvvəl Rusiyanın xarici işlər naziri Sergey Lavrov bəyan etmişdi ki, Gürcüstan üçün “üç üstəgəl üç” formatında qapılar açıqdır və “kürsü ayaqdadır”.

“Rusiya 3+3 formatında iştirak edir, ərazilərimizi işğal edib. “Əlbəttə, biz Rusiya ilə heç bir danışıqlar masasına oturmaq fikrində deyilik”, - Maçavariani bildirib.

O, xatırladıb ki, Rusiya ilə Gürcüstan arasında heç bir diplomatik və ya başqa münasibətlər yoxdur. Parlamentarinin sözlərinə görə, respublika ilk növbədə ərazi bütövlüyü məsələsini həll etməli, bundan sonra görüş formatlarının müzakirəsinə başlamaq mümkün olacaq.

“Üç üstəgəl üç” formatı Cənubi Qafqazın üç ölkəsi (Ermənistan, Azərbaycan və Gürcüstan) və üç qonşu ölkə (Rusiya, Türkiyə və İran) arasında məsləhətçi əməkdaşlıq formatıdır. Cənubi Qafqaz üzrə altıtərəfli əməkdaşlıq formatı təşəbbüsü 2020-ci ilin sonunda Azərbaycan və Türkiyə liderləri İlham Əliyev və Rəcəb Tayyib Ərdoğan tərəfindən irəli sürülüb.

 

Nigar