Rusiyalı futbolçu iki il müddətinə azadlıqdan məhrum edilib

Kurskda yerli “Avanqard”ın futbolçusu Dmitri Malıxin həbs cəzasına məhkum edilib.

 

Bu barədə Kursk vilayətinin məhkəmə sisteminin birləşmiş mətbuat xidmətinin Telegram kanalında məlumat verilib.

 

24 yaşlı idmançı 2024-cü ilin mayında 46 yaşlı qonşusunu döyməkdə təqsirli bilinib.

 

Məhkəmə iclası zamanı Malıxin günahını etiraf edib və zərərçəkmişə 350 min rubl məbləğində mənəvi ziyana görə təzminat ödəyib.

 

Müdafiə tərəfi onun şərti cəzasını istəyib, lakin məhkəmə oyunçunu Rusiya Federasiyası Cinayət Məcəlləsinin 111-ci maddəsinin 1-ci hissəsi (“Qəsdən sağlamlığa ağır zərər vurma”) ilə ümumi rejimli cəzaçəkmə müəssisəsində iki il müddətinə azadlıqdan məhrumetmə cəzasına məhkum edib.

 

Malıxin 2024-cü ilin fevralından “Avanqard”da çıxış edir. Bu mövsüm o, komandanın heyətində bütün turnirlərdə 17 oyun keçirib, iki qol vurub və bir məhsuldar ötürmə edib.

 

Nigar