BBC xəbər verir ki, Norveç polisi ölkədə qeydiyyatda olan və ekipajı Rusiya vətəndaşlarının olduğu Silver Dania gəmisini həbs edib.

Norveç hakimiyyət orqanları Baltik dənizində Latviya ilə İsveç arasında fiber-optik kabelin zədələnməsində gəminin iştirak edib-etmədiyini araşdırır. Norveçin şimalındakı Tromso şəhərinin polisi bildirib ki, həbs Latviya hakimiyyətinin tələbi ilə həyata keçirilib.

Norveç şirkətinə məxsus olan və Norveç bayrağı altında üzən Silver Dania gəmisi Sankt-Peterburqdan Murmansk istiqamətində hərəkət edirdi. Norveçin Barents Observer nəşrinə görə, Silver Dania donanması “rus tərəfdaşları ilə sıx əməkdaşlıq edən” Fjord Shipping şirkətinə məxsusdur.

Bazar günü Latviyanın Venspils şəhərindən İsveçin Qotland adasına gedən rabitə kabeli zədələnib. Hadisədən dərhal sonra İsveç hakimiyyəti Maltada qeydiyyatda olan və Bolqarıstanın Navigation Maritime Bulgare şirkətinin donanmasına daxil olan “Vezhen” quru yük gəmisini saxlayıb. “Reuters” “MarineTraffic” saytına istinadən xəbər verir ki, gəmi bir neçə başqa gəmi ilə birlikdə kabelin zədələndiyi ərazidə olub.

Bu, son vaxtlar Baltik dənizində sualtı kabellərin zədələnməsi ilə bağlı artıq dördüncü haldır.

Nigar