Aleksandr Duqin: “Rusiya, Türkiyə və İranın ortaq valyutası yaxında mümkün olacaq”

Türkiyə və digər ölkələrin ABŞ dollarından asılılığı azaltmaq axtarışları davam edərkən məşhur rusiyalı siyasi analitik, Kremlə yaxınlığı ilə tanınan politoloq Aleksandr Duqin maraqlı bir təklif irəli sürüb. Oxu24.com xarici mətbuata istinadla xəbər verir ki, Duqin Rusiya, Türkiyə və İranın Avrasiya pul vahidinə keçməsinin lazım olduğunu qeyd edib: “Üç ölkənin ortaq pul vahidi — Avrasiyanın meydana çıxması yaxın zamanda mümkün olacaq”.
“Türkiyə, Rusiya və İran bir araya gələrək Avrasiya pul vahidinə keçməlidir” — deyən Duqin sözlərini belə davam etdirib: “Avrasiya pul vahidi layihəsinin yaxın bir zamanda həyata keçəcəyini düşünürəm. Qazaxıstan çoxqütblü pul vahidi niyyətini elan edib. Avrasiya, İslami pul vahidi kimi məsələlər müzakirə edilir. Çin tərəfdə “qızıl yuan” layihəsi mövcuddur”.

“Neft və qaz ticarətində ABŞ dollarından imtina etmək məcburiyyətindəyik. Rusiya, İran və Türkiyə ABŞ-dakı qızıllarını geri çəkərək yeni bir pul vahidi yaratmalıdır. Bunun yaxın gələcəkdə mümkün olacağını düşünürəm. Amma dəqiq tarix verə bilmərəm” — politoloq vurğulayıb.

Qeyd edək ki, Avrasiya pul vahidi üzərində xeyli vaxtdır müzakirə aparılır. Rusiya prezidenti Vladimir Putin ötən il Avrasiya İqtisadi Birliyinin Qazaxıstanın paytaxtı Astanada keçirilən sammitində ortaq pul vahidindən istifadə edilməsini təklif edib. Putin birgə hərəkət edərək xarici iqtisadi və maliyyə təhdidlərinə daha asan cavab verə biləcəklərini bildirmişdi.   Oxu24.com