OPEC proqnozunu yenidən aşağı salıb

Neft İxrac Edən Ölkələr Təşkilatı (OPEC) bazar ertəsi günü bu il və gələn il qlobal neft tələbatının artımı ilə bağlı proqnozlarını yenidən aşağıya doğru nəzərdən keçirib. Bu baxış ardıcıl üçüncü dəfə həyata keçirilib.

Oxu24.com xəbər verir  ki, Oktyabr ayı üçün aylıq neft bazarı hesabatında OPEC 2024-cü ildə qlobal neft tələbi artımının sutkada 1,93 milyon barel olacağını bildirib ki, bu da ötən ayki artım proqnozundan sutkada 106 min barel azdır.

Təşkilatın fikrincə, bu düzəliş "müəyyən bölgələrdə neft tələbi göstəriciləri ilə bağlı bir qədər aşağı gözləntilərlə birlikdə alınan faktiki məlumatlarla" bağlıdır.

Üçüncü ardıcıl azalma proqnozuna baxmayaraq, OPEC bu il qlobal neft tələbatının artımının "COVID-19 pandemiyasından əvvəl görülən 1,4 milyon barellik tarixi orta göstəricidən hələ də xeyli yüksək olduğunu" bildirib.

Neft istehsalçıları assosiasiyası 2025-ci il üçün qlobal neft tələbatının artımı ilə bağlı proqnozunu ötən ayki 1,74 milyon barellə müqayisədə sutkada 1,64 milyon barelə endirib.

OPEC avqust və sentyabr aylarında dərc etdiyi aylıq bazar hesabatlarında 2024 və 2025-ci illərdə qlobal neft tələbatının artımı ilə bağlı proqnozlarını iki dəfə azaldıb. Avqust ayına qədər OPEC 2023-cü ilin iyulunda ilk dəfə dərc olunduğundan bəri bu il 2,25 milyon barel, gələn il isə 1,85 milyon barel olaraq təxminlərini dəyişməyərək saxlamışdı.

Bu ilin sentyabrında OPEC və onun müttəfiqlərinin birliyi olan OPEC+-ın səkkiz üzv ölkəsi neft hasilatının könüllü azaldılması müddətinin iki ay - noyabr ayına qədər uzadıldığını elan edib. Dekabrdan başlayaraq bu ölkələr neft hasilatına qoyulan məhdudiyyətləri mərhələli şəkildə aradan qaldırmağa başlayacaqlar.

 

Nigar