​​İtaliyanın şimal-şərqindən keçən Alp dağlarının Marmolada zirvəsindəki buzlaq 2040-cı ilə qədər yoxa çıxacaq.

OXU24.COM xəbər verir ki, bu proqnozla Padua Universitetinin alimləri çıxış ediblər.

Onlar Dolomitlərdəki ən böyük buzlağın qalınlığının nəzərəçarpacaq dərəcədə azaldığını bildirirlər. Buzlaq gündə 7-10 santimetr əriyir.

Bildirilir ki, təxminən 136 il əvvəl buzlaq 500 hektar ərazini əhatə edirdi və 700 futbol meydançası böyüklüyündə idi. Son 5 ildə o, 70 hektar və ya təxminən 98 futbol meydançasına bərabər olan ərazini itirib. 1888-ci ildən bəri isə buzlağın qalınlığı 3500 metrdən 1200 metrə geriləyib. Həmin dövrdən bu yana buzlaq ərazisinin 80 faizdən, həcminin isə 94 faizdən çoxunu itirib.

Araşdırmaya görə, İtaliyanın ən böyük buzlaqlarından biri sayılan Marmolada buzlağının qalan ömrü 13-22 ildir.