Lavrov İranla əməkdaşlıqdan danışdı

"Rusiya və İran arasında əməkdaşlığa dair dövlət sazişinin mətni tam razılaşdırılıb".

Oxu24.com xəbər verir ki, bu sözləri Rusiyanın xarici işlər naziri Sergey Lavrov BRİKS ölkələrinin xarici işlər nazirlərinin Nijni Novqorodda keçirilən görüşünün yekunlarına dair mətbuat konfransında bildirib.

Eyni zamanda o, qeyd edib ki, hələlik saziş imzalana bilməz - Tehran bəzi prosedur məsələlərini həll etməkdə qalır:

“Sazişdə qeyd olunan məsələlərlə bağlı bir sıra prosessual və qanunvericilik tədbirlərinin həyata keçirilməsi zəruridir”, - deyə Lavrov bildirib.

O, qeyd edib ki, Rusiya İranla əməkdaşlıq sazişi bağlamağa sadiqdir və bütün texniki məsələlər həll olunan kimi onu imzalamağa hazırdır.

Qeyd edək ki, İranın xarici işlər naziri vəzifəsini icra edən Əli Baqeri Kani BRİKS ölkələrinin xarici işlər nazirlərinin iclasında çıxış edərək Rusiya ilə qarşılıqlı əlaqə potensialının böyük olduğunu və yalnız artacağını bildirib. O, iki ölkə arasında əməkdaşlığın daha da səmərəli və uğurlu olacağına və heç bir hadisənin buna təsir edə bilməyəcəyinə əminliyini ifadə edib.

Rusiya və İran arasında yeni saziş üzərində iş 2022-ci ilin sentyabrında Rusiya və İran prezidentləri Vladimir Putin və İbrahim Rəisinin Səmərqənddə keçirilən ŞƏT sammiti çərçivəsində keçirilən görüşündən sonra məlum olub.

Xatırladaq ki, mayın 19-da İranın Şərqi Azərbaycan əyalətində baş verən təyyarə qəzasında prezident Rəisi, həmçinin İranın xarici işlər naziri Əmir Abdullahian və onları müşayiət edən şəxslər həlak olublar. Nijni Novqorodda keçirilən görüş İranın həlak olan nümayəndələrinin bir dəqiqəlik sükutla yad edilməsi ilə başlayıb.

Mənbə: Vesti.ru

Yeganə