14 min fələstinli uşaq həyatını itirib

Qəzza hökumətinin Media Ofisindən  İsrailin 165 gündür Qəzzada həyata keçirdiyi hücumlarla bağlı məlumat verilib.

 

Oxu24.com xəbər  verir  ki, açıqlamaya görə, İsrail ordusu oktyabrın 7-dən bu yana Qəzza zolağında 2807 qırğın törədib.

 

İsrail ordusunun Qəzza zolağına təşkil etdiyi hücumlarda 14 min uşaq və 9 min 220 qadın həyatını itirib.

 

Açıqlamada 7 min nəfərin dağıntılar altında qaldığı və ya itkin düşdüyü bildirilmiş, xəstəxanalara çatan ölənlərin sayının 31 min 819, yaralıların isə 73 min 934 olduğu bildirilib.

 

Qəzzada İsrailin hücumlarına məruz qalanların 72 faizinin qadın və uşaqlar olduğu vurğulanıb.

 

İsrailin xalqı ac-susuz qalmağa məcbur etdiyi, humanitar yardımların ölkəyə girməsinə mane olaraq humanitar fəlakətə səbəb olduğu Qəzzada 27 uşaq qida çatışmazlığı və susuzluqdan həyatını itirib.

İsrail on minlərlə ton partlayıcıdan istifadə edib

İsrail ordusunun oktyabrın 7-dən etibarən Qəzzaya 70 min tondan çox partlayıcı ilə hücum etdiyi vurğulanıb.

Açıqlamaya görə, İsrailin səhiyyə sektorunu da hədəf alan hücumları nəticəsində Qəzzada 364 səhiyyə işçisi və 48 mülki müdafiə əməkdaşı həyatını itirib.

İsrailin Qəzzaya təşkil etdiyi hücumlarda 135 jurnalistin öldüyü qeyd edilib.

 

Nigar