Dünya şöhrətli bətəkardan məktəbli forması ilə bağlı AÇIQLAMA

CƏMİYYƏT

2426

15.10.2026, 13:06

Xəbərlərimizi Google-da izləyin

Yeniliklərdən dərhal xəbərdar olun

Təhsil müəssisələrində vahid geyim standardı sadəcə zahiri bir tələb olmayıb, uşaqların psixoloji inkişafına və onların mənəvi-estetik dünyagörüşünün formalaşmasına xüsusi təsir göstərir. Uşaq yaşlarından eyni geyimdə böyüyən şagirdlər fərqliliyi geyimdə deyil, bilik, zəka və mənəvi dəyərlərdə axtarmağı öyrənirlər.

Bu qaydalar cəmiyyətdə birgəyaşayış mədəniyyətini aşılayır və gənclərə kiçik yaşlarından intizamlı olmağı vərdiş etdirir. Eyni zamanda, məktəbli formasının tətbiqi milli-mənəvi dəyərlərin və ümumtəhsil mədəniyyətinin qorunub saxlanılmasında mühüm strateji rol oynayır.

Lakin nizam-intizam çərçivəsində gənclərin daxili zövqünə, azad düşüncəsinə və fərdi inancına hörmətlə yanaşmaq da müasir təhsil anlayışının əsasını təşkil edir. Əsl maarifçilik və dünyəvilik fərqlilikləri kənara itirmək deyil, onları qarşılıqlı ehtiram və humanist prinsiplər çərçivəsində bir araya gətirməkdir.

Məktəb mühitində yalnız şagirdlərin deyil, müəllimlərin də geyim etikası və nümunəvi davranışı təlim-tərbiyə prosesinin ayrılmaz tərkib hissəsidir. Pedaqoq öz təmkinli duruşu və zövqlü geyimi ilə şagird üçün mənəvi-estetik orientir rolunu oynamalıdır. Məhz bu prinsiplər işığında maarifçilik ənənələrimizi davam etdirmək və gənc nəslin mənəvi yüksəlişini təmin etmək hər bir təhsil və mədəniyyət xadiminin borcudur.

Mövzu ilə bağlı Azərbaycan Bəstəkarlar İttifaqının sədri Firəngiz Əlizadə Oxu24.com-a öz mülahizələrini bölüşüb.

Firəngiz Əlizadə bildirib ki, məktəblərdə tətbiq edilən vahid geyim forması sıradan bir intizam tələbi olmayıb, şagirdlər arasında sosial bərabərliyi təmin edən və diqqəti zahiri fərqlərdən intellektual dəyərlərə yönəldən estetik bir vasitədir.

F.Əlizadənin sözlərinə görə, məsələyə pedaqoji bucaqdan yanaşdıqda müəllimlərin geyim etikası xüsusi əhəmiyyət kəsb edir. O bildirib ki, müəllim şagird üçün mənəvi və estetik nümunə olmalı, öz zahiri duruşu və təmkinli davranışı ilə səhnədəki sənətkarları xatırlatmalıdır. Təhsil verənin xarici görünüşü dərs mühitinin ciddiliyinə, zövqün aliliyinə və müəssisənin ümumi ruhuna uyğun gəlməli, nəzakət və zəriflik nümayış etdirməlidir.

Bəstəkar qeyd edib ki, əsl kamil cəmiyyət mənəviyyatı sırf formal qəliblərlə dəyərləndirən deyil, onu dərin bilik, yüksək mədəniyyət və insani keyfiyyətlərlə ölçən cəmiyyətdir:

“Məhz bu səbəbdən gənclərə intizamı öyrədərkən onların daxili estetik duyğularını və azad təfəkkürünü boğmamaq prioritet məqsəd olmalıdır”.

Üzeyir bəy Hacıbəyli irsi və qadın təhsili

Azərbaycan maarifçilik və musiqi tarixinin banisi Üzeyir bəy Hacıbəylinin irsinə toxunan İttifaq sədri vurğulayıb ki, dahi bəstəkarın qadınların təhsili və cəmiyyətdəki ali mövqeyi uğrunda atdığı addımlar bu gün də əsas mayoqdur. Üzeyir bəy Şərq qadınının elmin, incəsənətin və ictimai həyatın tam mərkəzində olmasını, intellektual cəhətdən yüksəlməsini özünün müqəddəs amalı sayırdı.

F.Əlizadə əlavə edib ki, böyük mütəfəkkirin irsi qadın azadlığı və ucalığının sırf zahiri formalarla deyil, dərin bilik, azad düşüncə və mənəvi zənginliklə mümkün olduğunu göstərir. Bu müqəddəs yola sadiq qalaraq, gənc qızlarımızın və qadınlarımızın elmin, incəsənətin və mənəviyyatın işığında ucalması cəmiyyətimizin ən böyük zəfəridir.

Çimnaz Telmanqızı

Həmçinin oxuyun